ކުރީގެ ރައީސް ޑރ.ވަހީދު މިފަދައިން ވިދާޅުވީ ރޭ ކުޅުދުއްފުށީގައި ބޭއްވި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ކެމްޕެއިން ޖަލްސާގައި އެޕާޓީގެ މެމްބަރުންނާއި މުހާތަބުކޮށް ވާހަކަފުޅު ދައްކަވަމުންނެވެ.
ޕީޕީއެމްގެ ތެރެއިން ކަންކަން ކޮށްފައި ވަނީ ނާއިންސާފުން ކަމަށާއި، މުޅިން ހީކުރި ގޮތާއި ތަފާތުކޮށް ކަމަށް ޑރ.ވަހީދު ވިދާޅުވިއެވެ. އަދި ކަންތައް ހިނގާފައިވަނީ ރައީސް ޔާމީން އެދިލައްވާފައިވާ ގޮތަކަށް ވެސް ނޫން ކަމަށް ޑރ. ވަހީދު ވިދާޅުވިއެވެ.
އިތުރަށް ޑރ.ވަހީދު ވިދާޅުވީ ޕީޕީއެމް ތެރޭގައި ތިން އޮޕްޝަނެއް ކަނޑައަޅާފައިވާ ކަމަށާއި، އޭގެ ތެރެެއިން ޕްލޭން އޭ އަކީ ރައީސް ޔާމީން މިނިވަންވެ ވަޑައިގެން ކުރިމަތިލެއްވުން ކަމަށެވެ. ދެން އޮތީ ޕްލޭންބީ ކަމަށާއި، އެއީ ރައީސް ޔާމީނަށް ކުރިމަތި ނުލެއްވޭ ހާލަތުގައި ޕީޕީއެމުން އިތުރު ކެންޑިޑޭޓެއް ނެރުން ކަމަށެވެ.
ވަހީދު ވިދާޅުވީ ޕްލޭން ސީ އަކީ ޕްލޭން ބީ މަސައްކަތް ނުކޮށްފި ހާލަތެއްގައި ކުރިއަށްދާން އޮތް އޮޕްޝަން ކަމަށެވެ. ނަމަވެސް ޕްލޭން ބީ އަށް އެދިގެން ހުއްޓާ އެމަނިކުފާނަށް އެ ފުރުސަތު ނުދީ ޕީއެންސީގެ ކެންޑިޑޭޓަށް އެ ފުރުސަތު ދެއްވާފައިވާ ކަމަށް ޑރ.ވަހީދު ވިދާޅުވިއެވެ.
ޑރ. ވަހީދަކީ ރައީސް ނަޝީދުގެ ދައުރުގައި ނަޝީދުގެ ނައިބު ރައީސެވެ. ނަޝީދު ވެރިކަން ވެއްޓެން މެދުވެރިވީ ވަހީދުގެ ބައިވެރިވުމާއި އެކު ވެރިކަން ބޭނުންވެގެން ކުރެއްވި ބަޢާވާތަކުން ކަމަށް އެމްޑީޕީން ތުހުމަތު ކުރެއެވެ. ނަޝީދު ވެރިކަމުން އިސްތިއުފާ ދެއްވުމުން ވެރިކަމާއި ހަވާލުވެ ވަޑައިގެން އެ ދައުރުގެ ބާކީ ދެ އަހަރު ވެރިކަން ކުރެއްވީ ޑރ.ވަހީދެވެ.
ޕީޕީއެމުން ރިޔާސީ ޓިކެޓް ޕީއެންސީގެ ކެޑިޑޭޓު ޑރ. މުހައްމަދު މުއިއްޒުއަށް އެރުވުމާއި ގުޅިގެން އެމަނިކުފާނު ވަނީ ޕީޕީއެމް ދޫކުރައްވާ ޖުމްހޫރީ ޕާޓީއަށް ވަޑައިގެން ގާސިމްގެ ކެމްޕޭނާ ގުޅިވަޑައިގެންފައެވެ.
ޑރ. ވަހީދު ވިދާޅުވި ގޮތުގައި ރައީސް ޔާމީންގެ ކެންޑިޑެންސީ ގަބޫލު ނުކުރަން ސުޕްރީމް ކޯޓުން ނިންމިފަހުންވެސް ޕީޕީއެމްގެ ކެންޑިޑޭޓަކު ނެރެން ވަގުތު ވެސް ލިބުނެވެ.
