އެ ޕާޓީން ބުނީ ރިޔާސީ ކެންޑިޑޭޓު މިގޮތަށް ވިދާޅުވީ ރިޔާސީ ކެމްޕޭނުގައި ހއ. އިހަވަންދޫއަށް ވަޑައިގެން އެ ރަށުގެ ސަޕޯޓަރުންނާ މުހާތަބުކުރައްވާ ދެއްކެވި ވާހަކަފުޅުދައްކަވަމުން ކަމަށެވެ.
އިލްޔާސް ވިދާޅުވީ، އެފަދައިން ބޮޑުތިލަދުންމައްޗަށް ހަތަރު ވަޒީރުންގެ މަގާމު ދެނީ އެ ފަރާތްތަކާ ގުޅިގެން އެ ސަރަހައްދު ތަރައްގީކޮށް ކުރެއެރުވުމުގެ ބޭނުމުގައި ކަމަށެވެ. އަދި އެކަން ވެގެންދާނެ ކަމަށާއި އެ ވަޒީރުންނާއެކު އެކީގައި މަސައްކަތް ކުރައްވާނެ ކަމަށްވެސް އިލްޔާސް ވިދާޅުވިކަމަށް ދަ ޑިމޮކްރެޓުން ބުންޏެވެ.
މީގެއިތުރުން އިލްޔާސް ވަނީ މި ސަރުކާރުން 2018 ގައި އިހަވަންދޫއަށް ވި ވައުދުތަކާއި އެ ކަންކަން މިހާރު އޮތް ހާލަތް އެ ރަށުގެ ރައްޔިތުންނާ ހިއްސާކުރައްވާފައެވެ. އެގޮތުން، މި ސަރުކާރުގެ މަޝްރޫއުތަކުގެ ސްޕީޑު ލަސްވުމާއި ގިނަ ވައުދުތައް ފުއްދިފަ ނުވާކަން ކެންޑިޑޭޓު ފާހަގަކުރެއްވިކަމަށް އެ ޕާޓީން މިއަދު ބުންޏެވެ.
މީގެއިތުރުންވެސް ރަށުގެ ބޯހިޔާވަހިކަމަށް ގެނެސްދޭން ވައުދުވި ހައްލާއި ބަނދަރަށް ގެނެސްދޭން ވައުދުވި ހައްލުވެސް ނުގެނެސްދެވުނު ކަމަށާއި، ރިޔާސީ ކެމްޕޭނުގައި މި އަހަރުވެސް ރައީސް އިބްރާހިމް މުހައްމަދު ސޯލިހު އިހަވަންދޫއަށް އަރާ ގިނަ ވައުދުތަކެއްވީ ރައްޔިތުން ގުނބޯ ހެއްދުމަށް ކަމަށް ކެންޑިޑޭޓު ވިދާޅުވި ކަމަށް ޑިމޮކްރެޓްސް އިން ބުންޏެވެ.
އިހަވަންދޫގައި އެންމެ ކުރިއަރާފައިވާ މަސައްކަތަކީ ކަނޑު އުޅަނދު ނުވަތަ ބޯޓު ބަނުންކަން ފާހަގަކުރައްވާ އިލްޔާސް ވަނީ މިއަދު އެ މަސައްކަތް ކުރާ ފަރާތްތަކަށް ބޭނުންވާ ބޯޓު ޔާޑާއި ސްލިޕްވޭ ނެތްކަން ފާހަގަކުރައްވާފައެވެ. އަދި، ޑިމޮކްރެޓުންގެ ވެރިކަމެއްގައި އެކަންކަމަށް ހައްލު ހޯއްދަދެއްވާނެ ކަމަށް ވިދާޅުވިކަމަށް ވެސް އެ ޕާޓީން ބުންޏެވެ.
