އިލްޔާސް މިހެން ވިދާޅުވީ އެ ޕާޓީގެ ރިޔާސީ ކެމްޕޭނުގައި ޅޮއްސަށް ވަޑައިގެން އެ ރަށުގެ ރައްޔިތުންނާ މުހާތަބުކޮށް ދެއްކެވި ވާހަކަފުޅުގަ އެވެ.
ޑިމޮކްރެޓްސް އިން ބުނީ ނ. ޅޮހީގައި އޮންނަ ސާފް ޕޮއިންޓު އިތުރަށް ތަރައްގީކޮށް އެ ރަށަށް ސާފުކުރަން އަންނަ ފަތުރުވެރިންނަށް އެއީ އެދާއިރާގެ ހިދުމަތްތައް ލިބޭނެ މަންޒިލެއްގެ ގޮތުގައި ތަރައްގީ ކުރިވިގެންދާނެ ކަމަށް ޑިމޮކްރެޓުންގެ ކެންޑިޑޭޓު އިލްޔާސް ލަބީބު ވައުދުވެވަޑައިގެންފައިވާކަމަށެވެ.
އެގޮތުން އެ ސާފް ޕޮއިންޓަކީ ރާއްޖޭގައިވެސް މަޝްހޫރު އަދި ފަތުރުވެރިންގެ މެދުގައިވެސް މަގުބޫލު ތަނެއްކަން ކެންޑިޑޭޓު ފާހަގަކުރެއްވިކަމަށްވެސް އެ ޕާޓީން ބުންޏެވެ.
އެ ޕާޓީން ބުނީ އިލްޔާސް ވިދާޅުވީ ޑިމޮކްރެޓުންގެ ސަރުކާރެއްގައި ޅޮހީގެ ސާފް ޕޮއިންޓޮ، އެ ރަށުގެ ރައްޔިތުންނާއި ޒުވާނުން ބޭނުންވާ ގޮތަށް ތަރައްގީކޮށް، އެ ސާފް ޕޮއިންޓުން ސީދާ ޅޮއްސަށް މަންފާ ލިބޭނެ ގޮތް ހަދައިދެއްވާނެ ކަމަށް ވިދާޅުވިކަމަށެވެ.
ނ. އަތޮޅު މާފަރުގައި ތަރައްގީ ކުރެވޭ އިންޓަނޭޝަނަލް އެއާޕޯޓާއެކު ޅޮހީގައި ގެސްޓްހައުސް ވިޔަފާރިއާއި ފަތުރުވެރިކަމުގެ ދާއިރާގެ އެހެން ވިޔަފާރިތައްވެސް ކުރިއަރުވަން މި ޕާޓީގެ ސަރުކާރެއްގައި އެހީވާނެ ކަމަށް ކެންޑިޑޭޓު ވިދާޅުވި ކަމަށް އެޕާޓީން ބުންޏެވެ. ޑިމޮކްރެޓުންގެ ވެރިކަމެއްގައި އެފަދައިން ފަތުރުވެރިން ގެންދިއުމުގައި އޮތް އެންމެ ބޮޑު އެއް ހުރަސް ކަމުގައިވާ ފްލައިޓު ޓިކެޓުގެ ފަރަގު އުވާލާ ދިވެހިންނާ އެއްވަރުކުރެވޭނެއެވެ.
ފަތުރުވެރިކަމާއި ސާފިންގެ އިތުރުން އިލްޔާސް ވަނީ ޅޮއްސަކީ ފަންނުވެރިން ގިނަ ރަށެއްކަން ފާހަގަކުރައްވާ އެފަދަ ފަރާތްތަކަށް ޑިމޮކްރެޓުންގެ ސަރުކާރެއްގައި އޮތް ސިޔާސަތުތައް ތަފުސީލުކޮށްދެއްވާފައިވާކަމަށް ވެސް އެ ޕާޓީން ބުންޏެވެ.
ކެންޑިޑޭޓު އިތުރަށް ފާހަގަކުރެއްވީ ޑިމޮކްރެޓުންގެ އެންމެ ބޮޑު ފޯކަސް އަކީ އެފަދަ ކްރިއޭޓިވް ކުދި ވިޔަފާރިތައް ކުރާ ކުދިންނަށް އިތުރު ހިތްވަރަކާއި މާލީ އެހީދީ، އެ މަސައްކަތުގައި ދިމާވާ ދަތިތައް، މިސާލަކަށް ވަސީލަތްތަކާއި ޑޮލަރު ހޯދުމުގައި ހުރި ދަތިތައް ނައްތާލުން ކަމަށެވެ.
