ރައީސް މިހެން ވިދާޅުވީ ރ. މީދޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އިންސާފު ގާއިމު ކުރުމާއި އިންސާފު އަވަހަށް ލިބިދިނުމަކީ ރައްޔިތުންނަށް އެންމެ މުހިއްމު ކަންތައް ކަމަށެވެ. އެމްޑީޕީ ވުޖޫދުވެގެން އައީ އިންސާފުގެ މައްޗަށް ކަމަށާއި، އިންސާފު ރައްޔިތުންނަށް ހޯދައި ދިނުމަށް ކަމަށް ރައީސް ސޯލިހު ވިދާޅުވިއެވެ.
ރައީސް ވިދާޅުވީ މިކަން މިހެން އޮތުމުން އެމްޑީޕީގެ ސިޔާސަތުތަކާއެކު ކުރިއަށްދާނީ އިންސާފުން ގާއިމު ކުރުން ކަމަށާއި، އެހެންކަމުން ވޭތުވެދިޔަ ފަސްއަހަރު ތެރޭ ޝަރުއީ ދާއިރާ އަށް ރައްޔިތުންގެ ވަރަށްބޮޑު އިތުބާރެއް ލިބިފައިވާ ކަމަށެވެ. ހާއްސަކޮށް ސްޕްރީމް ކޯޓާއި ދޭތެރޭ ވަރަށް ބޮޑަށް އިތުބާރު އުފެދިފައިވާ ކަމަށްވެސް ރައީސް ވިދާޅުވިއެވެ.
ފަނޑިޔާރުންގެ ގޮތުގައި އަންހެން ފަނޑިޔާރުން އައްޔަން ކުރެވުމަކީ ލިބުނު ވަރަށް ބޮޑު ކުރިއެރުމެއް ކަމަށްވެސް ރައީސް ވިދާޅުވިއެވެ. މީގެ އިތުރުން ސްޕްރީމް ކޯޓްގެ ބެންޗަށް އަންހެން ފަނޑިޔާރުން ގެނަވުމަކީ ލިބުނު އިންގިލާބީ ބަދަލެއް ކަމަށް ރައީސް ސޯލިހު ވިދާޅުވިއެވެ.
އިންސާފު ލިބޭ ކަމަށް މިއަދު ރައްޔިތުން ގަބޫލު ކުރާ ކަމަށާއި، އަދި މިފަދަ އެތައް ކަމެއް ސިޔާސަތު ތަކުގެ ތެރެއިން ފެންނާނެ ކަމަށް ވެސް ރައީސް ވިދާޅުވިއެވެ.
މީދޫ އަށް ރައީސް ސޯލިހު ވެވަޑައިގެންނެވި ވައުދުތައް:
މީދޫ ބަނދަރު ބޮޑުކުރުމުގެ އަމަލީ މަސައްކަތް ކުރުން
މީދޫގައި ކޮންޓްރެކްޓް ކުރެވިފައިވާ އާ ހޮސްޕީޓަލް ނިންމުން
ބޯހިޔާވަހިންކަން ހައްލު ކުރުމަށް ހައުސިން މަޝްރޫއެއް ގާއިމު ކުރުން
ޒަމާނީ ފެންވަރަށް މަގުތައް ހަދާ ތާރު އަޅާ ނިންމުން
ބޮޑު މިސްކަތެއް އަަޅައި ދިނުން
ކަރަންޓްގެ ކެޕޭސިޓީ އިތުރު ކުރުމައްޓަކާއި އާ އިންޖީނުގެއެއް އަޅައިދިނުން
ޒުވާނުންނަށް ވޮލީ ކޯޓަކާއި ފުޓްބޯޅަ ސްޓޭޑިޔަމްގެ ރޮސްޓްރަމް އަޅައިދިނުން
ޒުވާނުންނަށް ކޮމިއުނިޓީ ސެންޓަރެއް އަޅައިދިނުން
