ރިޔާސީ އިންތިހާބުގެ ކެމްޕޭނަށް ހުވަދުއަތޮޅަށް ކުރައްވާ ދަތުރުފުޅުގައި، މިއަދު ގއ. ވިލިގިއްޔަށް ވަޑައިގެން، އަމްރު ވިދާޅުވީ ވިލިގިލި ކޫއްޑޫ ގުޅާލުމަށް ބްރިޖެއް އެޅުމަކީ މިހާރު މިއޮތް ސަރުކާރު ވެރިކަމަށް ގެނައުމަށް، އެބޭފުޅުން ވިލިގިލި ރައްޔިތުންނަށް ވި ވައުދެއް ކަމަށާއި، އެހެންނަމަވެސް، ވެރިކަމުގެ ދައުރު ނިމުމަކާއި ހަމައަށް އައިރު، އެކަން ނުވެއޮތީ މިސަރުކާރަށް އެކަން ކުރަން ނޭގުމުން ކަމަށެވެ.
އަދި ޑިމޮކްރެޓްސްގެ ސަރުކާރެއްގައި ވިލިިގލި ރައްޔިތުންނަށް އެކަން ކޮށްދެއްވާނެކަމަށް ބުނެ ވައުދުވެވަޑައިގެންނެވިއެވެ.
އަމްރު ވިދާޅުވީ ކޫއްޑޫއަކީ ވަޒީފާގެ ފުރުސަތުތައް ގިނަ ރަށެއް ކަމަށާއި ބްރިޖަކުން ގުޅާލެވިއްޖެނަމަ ވިލިގިލި ރައްޔިތުންނަށް އެ ފުރުސަތު ވެސް ހުޅުވިގެންދާނެ ކަމަށެވެ. ބްރިޖް އެޅުމުން ކޫއްޑުއަށް އަންނަ ފަތުރުވެރިންނަށް ވިލިގިއްޔަށް އާދެވި އެކަމުގެ ސަބަބުން ވިލިނގިލީގެ ރައްޔިތުންނަށް އެތަކެއް ފައިދާތަކެއް ވާނެ ކަމަށް އަމްރު ފާހަގަ ކުރެއްވިއެވެ.
ގއ.ވިލިގިއްޔާއި ކޫއްޑޫ ބްރިޖަކުން ގުޅާލުމަކީ މިސަރުކާރުގެ ރިޔާސީ ވައުދެކެވެ. އެހެންނަމަވެސް މިއަދާއި ހަމައަށް އައިއިރުވެސް އެކަން ނުކުރެވި އޮތުމާއެކު، އެރަށުގެ ރައްޔިތުންނާއި އަދި ކައުންސިލް އިދާރާގެ ފަރާތުން ކަންބޮޑުވުން ފާޅުކޮށްފައިވެއެވެ.
މިއަހަރުގެ ރިޔާސީ ކެމްޕޭނަށް ރައީސް ސޯލިހު ވިލިގިއްޔަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ވިދާޅުވީ، ވިލިގިއްޔާއި ކޫއްޑޫ ބްރިޖަކުން ގުޅާލުމުގެ މަޝްރޫއަށް ބޭނުންވާ ދިރާސާ މިހާރު ނިމިފައިވާ ކަމަށާއި އަދި އެމަޝްރޫއު ކުރިއަށް ނުގެންދާ ގޮތަކަށް އެއްވެސް ގޮތަކަށް ނުނިންމާ ކަމަށާއި، އެހެންނަމަވެސް، އެމަޝްރޫއު ކުރިއަށް ގެންދާނީ ރައްޔިތުންނާއި އިތުރަށް މަޝްވަރާކުރުމަށްފަހު އެމަޝްރޫއު ކުރިއަށް ގެންދަން ރައްޔިތުން ބޭނުންވެލައްވާ ނަމަ ކަމަށް ވިދާޅުވެފައެވެ. އެއީ އެމަނިކުފާނުގެ އަތްޕުޅުގައި، ވިލިގިއްޔާއި ކޫއްޑޫ ބްރިޖްއަކުން ގުޅާލުމަށްވުރެ އެތަކެއްގުނަ ފައިދާ ބޮޑު މަސައްކަތްތަކުގެ ޕްރޮޕޯސަލްތަކެއް ހުރުމުން ކަމަށްވެސް ރައީސް ސޯލިހު ވިދާޅުވިއެވެ.
