ސީއެންއެމްޓީވީގެ ތޭވީސް ޕްރޮގުރާމްގައި ވާހަކަފުޅު ދައްކަވަމުން އިހުސާން ވިދާޅުވީ ރިޔާސީ މެނިފެސްޓޯ އެއްގައި ވަކި ސުކޫލެއްގެ ވާހަކަ ފާހަގަ ކުރައްވާފައި ނޯންނާނެ ކަމަށާއި، ނަމަވެސް އަރަބިއްޔާ ސުކޫލް ހިމަނާފައިވުމަކީ އެ ސުކޫލަށްދޭ އަހަންމިއްޔަތުކަން ކަމަށެވެ.
އިހުސާން ވިދާޅުވީ އެ ސުކޫލް ނިންމާނީ ދައުރުގެ މެދުން ކަމަށެވެ. އެއީ ސްޓެޓެޖިކް އެކްޝަން ޕްލޭނާއި އެއްގޮތަށް ޕްލޭން ކުރެވިގެން ކުރައްވާނެ ކަމެއް ކަމަށެވެ.
އަދި ތައުލީމީ ދާއިރާ އާއި ގުޅޭގޮތުން ވާހަކަފުޅު ދައްކަވަމުން އިހުސާން ވިދާޅުވީ، މެނިފެސްޓޯ އެކުލަވާލުމުގައި ވަރަށްގިނަ ކަންތައް ކޮށްފައިވާ ކަމަށާއި، އެގޮތުން ފުރަތަމަ ކަމެއްގޮތުން ރައަޔިތުންނާއި ހަމަޔަށް ގޮސްގެން ރައްޔިތުންނާއި ގާތުން ބައްދަލު ވެސް ކޮށްފައިވާ ކަމަށެވެ.
އަދި އެކި ބައްދަލުވުން ތަކުގައި ބެލެނެވެރިންނާއި ގާތުން ބައްދަލުވުމަކީ އެންމެ އިސްކަން ދީފައިވާ ކަންތައް ކަމަށްވެސް އިހުސާން ވަނީ ވިދާޅުވެފައެވެ.
އަރަބިއްޔާ ސްކޫލްގެ ދަރިވަރުން ވަގުތީ އިމާރާތެއްގައި ތައުލީމް ހާސިލްކުރަމުން އަންނަނީ މުހިންމު އެތައް ކަމަކުން މަހްރޫމްވެގެން ތިބެ ކަމަށްބުނެ އެސްކޫލްގެ ބެލެނިވެރިން ވަނީ މީގެކުރިން ކަންބޮޑުވުން ފާޅުކޮށްފައެވެ.
ބާ ޖަމާލުއްދީން ބިމުގަ އަރަބިއްޔާ ސްކޫލްގެ އާ އިމާރާތެއް އެޅުމަށް މި ދިޔަ ސެޕްޓެމްބަރު މަހު ވަނީ އަމީން ކޮންސްޓްރަކްޝަން އާއި ހަވާލުކޮށްފައެވެ.
މި ދިޔަ އަހަރު ސެޕްޓެމްބަރު މަހު އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި އެ އިމާރާތް އެޅުމުގެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓަރު އައިޝަތު އަލީ އެވެ. އަދި އަމީން ކޮންސްޓްރަކްޝަންގެ ފަރާތުން ސޮއި ކުރެއްވީ ސެކްރެޓަރީ އިބްރާހިމް ނިހާދެވެ.
2024 ގެ ޖެނުއަރީގައި އެ އިމާރާތްތަކުގައި އަރަބިއްޔާ ދަރިވަރުންނަށް ކިޔަވައިދޭން ފަށާނެ ކަމަށް ވިދާޅުވެފައިއެވެ.
އެ މަސައްކަތް އެޑިއުކޭޝަން މިނިސްޓްރީއިން އަމީން ކޮންސްޓްރަކްޝަން އާއި ހަވާލުކުރީ 420 ދުވަހުގެ ތެރޭގައި ނިންމާ ގޮތަށެވެ.
މިނިސްޓްރީން ނިންމީ ބާ ޖަމާލުއްދީންގައި އަރަބިއްޔާ އަލުން އިމާރާތް ކުރުމަށެވެ. އެންމެ ފުރަތަމަ ބާޖަމާލުއްދީން ހުރި ބިމުގައި އެޅުމަށް ހަމަޖެހިފައިވަނީވެސް އަރަބިއްޔާ ސްކޫލެވެ. ނަމަވެސް ފަހުން އެ ބިމުން އެއްބައި ޖަމާލުއްދީން ސްކޫލަށް ދިނުމަށް ނިންމާފައިވެއެވެ.
