އެ ސެންޓަރުގެ ބިންގާ އަޅުއްވައިދެއްވީ ޑިފެންސް މިނިސްޓަރު މާރިޔާ އަހުމަދު ދީދީއާއި ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް އަބްދުﷲ ޝަމާލެވެ.
ހދ. ހަނިމާދޫގައި އަޅާ ސިފައިންގެ ހެޑްކުއާޓަރުން ރާއްޖޭގެ ހަނިމާދޫ ހިމެނޭ ސަރަހައްދުގައި ޑުރަގު ޓްރެފިކް ކުރުމާއި ގަވާއިދާ ހިލާފަށް މަސްވެރިކަން ކުރުން ހުއްޓުވުމަށް އެ ސެންޓަރު މުހިންމު ދައުރެއް އަދާކުރާނެ ކަމަށް މިނިސްޓަރު މާރިޔާ ވިދާޅުވިއެވެ. އެ ސަރަޙައްދަކީ ކިހާ މުހިންމު ތަނެއްކަން އެގޭ ކަމަށާއި، ސިފައިންގެ މަސްއޫލިއްޔަތު އަދާކުރުމުގައި މިއީ ވަރަށް ބޮޑު ދައުރެއް އަދާކުރާ ފޯމޭޝަނެއް ކަމަށް މާރިޔާ ވިދާޅުވިއެވެ.
ފާއިތުވި ދުވަސްތަކުގައި ކަނޑުމަތީގެ 232 ހާދިސާއެއް އެ ސަރަހައްދުގައި ހިނގާފައިވާ ކަމަަށާއި، އަދި 526 ފަރާތެއްގެ ސަލާމަތްތެރިކަން ފޯރުކޮށްދީފައިވާ ކަމަށެވެ. މިގޮތުން އެ އޭރިއާގައި އެކަނިވެސް، ސީ އެމްބިއުލާންސާއި ކޯސްޓްގާޑް އުޅަނދުތަކުގައި 4،000 އަށްވުރެ ގިނަ މެޑިކަލް އިވަކުއޭޝަން ހިންގާފައިވާ ކަމަށް ވެސް މާރިޔާ ފާހަގަ ކުރެއްވިއެވެ.
ގަވާއިދާއި ހިލާފަށް ދިވެހި މަސްކަނޑުތަކުން މަސްވެރިކަން ކުރަނިކޮށް ކޯސްޓްގާޑްގެ ބެލުމުގެ ދަށަށް މި 5 އަހަރު ތެރޭގައި ގެނެވުނު އުޅަނދު ފަހަރުތަކުގެ 41 އިންސައްތަ އަތުލައިގަނެވިފައި ވަނީވެސް ނޮދަން ކޮމާންޑްގެ ސަރަޙައްދުން ކަމަށްވެސް އެމްއެންޑީއެފުން ވަނީ ބުނެފައެވެ.
މީގެ އިތުރުން އެއްގަމަށް ބަލާއިރު، 100 އަށްވުރެ ގިނަ އަލިފާނުގެ ހާދިސާއަކަށް ފަޔާ އެންޑް ރެސްކިއު ސަރވިސް އިން ހަރަކާތްތެރިވެފަވާ ކަމުގައި ވެސް އެމްއެންޑީއެފުން ބުނެއެވެ.
އެމްއެންޑީއެފުން އުތުރުގެ ފަސްރަށުގައި ޕެރޭޑެއް ބާއްވަން ވެސް ވަނީ މި ކަމާއި ގުޅިގެން ފަށާފައެވެ. އެއީ ހެޑްކުއޯޓާޒް ހދ.ހަނިމާދޫއަށް ބަދަލުކުރާތީ، އެކަން ފާހަގަކުރުމުގެ ގޮތުން ކަމަށް ސިފައިން ވަނީ ބުނެފައެވެ.
