ޒަމީލް "ސީއެންއެމް" އަށް ވިދާޅުވީ އޭނާގެ މެނިފެސްޓޯގައި ވަރަށް ގިނަ ކަންތައްތަކެއް އެބަހުރި ކަމަށާއި، އެގޮތުން ރައްޔިތުންނަށް ބޭނުންވާ މުހިންމު ކަންތައްތަކެއް ހިމަނުއްވާނެ ކަމަށެވެ.

ނަމަވެސް އޭނާގެ މެނިފެސްޓޯ އަކީ 10 ސަފްހާގެ މައްޗަށް އެކުލެވިފައިވާ މެނިފެސްޓޯ އެއް ކަމަށްވެސް ޒަމީލް ވިދާޅުވިއެވެ.

މީގެ ކުރިންވެސް ކުރިއަށް އޮތް ފަސް އަހަރަށް ވެރިކަމަށް ހޮއްވަވާއިފިނަމަ ގޭގައި ތިބޭ ބެލެނެވެރިންނަށް 20،000 ރުފިޔާގެ އާމްދަނީ އެއް ދޭނެ ކަމަށް ވެސް ޒަމީލް ވަނީ ވިދާޅުވެފައެވެ.

ކެމްޕެއިން ކުރައްވާނީ ސޯޝަލް މީޑިޔާ މެދުވެރިކޮށް ކަމަށްވެސް ޒަމީލް ވިދާޅުވިއެވެ. އަދި މީގެ ދެ ފަހަރެއްގެ މަތިން ރައްޔިތުންނާއި ބައްދަލު ކުރައްވާފައިވާ ކަމަށާއި، އެގޮތުން ޖައްމިއްޔާތަކުންވެސް ބައްދަލު ކުރައްވާފައިވާ ކަމަށެވެ. 

ހަސަން ޒަމީލް އަކީ މިފަހަރު އަމިއްލަ ގޮތުން ވާދަކުރައްވާ ތިން ކެންޑިޑޭޓުންގެ ތެރެއިން އެއް ކެންޑިޑޭޓެވެ. އެގޮތުން ޒަމީލްގެ ކެންޑިޑޭޓް ނަމަބަރަކީ 2 އެވެ. މީގެ ކުރިން ޒަމީލް އަކީ ސަރުކާރުގެ ސިޔާސީ މަގާމެއް ފުރުއްވާފައިވާ ފަރާތެކެވެ. އެބޭފުޅާ ފުރުއްވާފައިވާ މަގާމަކީ ޑިފެންސް މިނިސްޓރީގެ ނައިބު ކަމުގެ މަގާމެވެ.

މިފަހަރު ޒަމީލް ވާދަ ކުރައްވާއިރު، މިއީ ދެމަފިރިއަކު ރިޔާސީ އިންތިހާބެއްގައި ވާދަކުރާ ފުރަތަމަފަހަރެވެ. ޒަމީލްގެ ރަނިންމޭޓަކަށް ހަމަޖައްސާފައި ވަނީ އޭނާގެ އަނބިކަނބަލުން މަރިޔަމް އަލީމްއެވެ. އަދި އިންތިހާބީ އެޖެންޓަކީ އޭނާގެ ދަރިކަލުން އަހުމަދު މަހުރާން ޒަމީލެވެ.