ދިޔަމިގިލީ ފެނަކަ އާ އޮފީސް އިމާރާތާއި ކުޑަކުދިންގެ ޕާކު ރައީސް ހުޅުވައިދެއްވާފައިވަނީ ކޮޅުމަޑުލަށް ފެއްޓެވި ރިޔާސީ ދަތުރުފުޅުގެ ތެރެއިން މިއަދު މެންދުރު އެ ރަށަށް ކުރެއްވި ޒިޔާރަތުގައެވެ.
ރައީސް އޮފީހުން ބުނީ ދިޔަމިގިލީ ފެނަކަ އާ އޮފީސް އިމާރާތަކީ، ދަތިނުވެ 30 މުވައްޒަފުންނަށް މަސައްކަތް ކުރެވޭ ޒަމާނީ އޮފީސް އިމާރާތެއް ކަމަށެވެ. ދިޔަމިގިލީ ކުޑަކުދިންގެ ޕާކަކީ ޔޫތު މިނިސްޓްރީ އާއި ދިޔަމިގިލީ ކައުންސިލުގެ އިތުރުން ފެނަކަ ކޯޕަރޭޝަނުގެ އެހީތެރިކަމާ އެކު ހަދާފައިވާ ޕާކެއް ކަމަށް އެ އޮފީހުން ބުނެއެވެ.
ރައީސް އޮފީހުން ބުނީ އަތޮޅުތަކުގެ ރަށްރަށުގައި އަސާސީ ހިދުމަތްތައް ގާއިމުކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން ވަނީ އަތޮޅުތަކުގެ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫއުތައް ހިންގާފައި ކަމަށެވެ.
ފަހުރުވެރި، އަބުރުވެރި ދިރިއުޅުމެއް އުޅެވޭނެހެން މަގުފަހިކުރުމަށް ރާއްޖޭގެ ރަށްރަށުގެ ތަރައްގީއަށް ސަރުކާރުން ދަނީ ގިނަ ގުނަ މަސައްކަތްތަކެއް ކުރަމުން ކަމަށް އެ އޮފީހުން ބުނެއެވެ.
