ކުރީގެ ރައީސް މުހައްމަދު ނަޝީދުގެ ވެރިކަމުގައި ސްޕެޝަލް އެންވޯއީގެ މަގާމާއި ވަޒީރުކަން ވެސް ކުރެއްވި ޒަކީގެ ޕާސްޕޯޓް ކެންސަލް ކުރަން ސިވިލް ކޯޓުން 2020 ވަނަ އަހަރު އަމުރެއް ނެރުނީ ހުކުމް ތަންފީޒު މައްސަލައެއްގައެވެ.
މި މައްސަލައިގައި ސިވިލް ކޯޓުން ނިންމި ނިންމުން ދައުލަތުން ހައިކޯޓަށް ހުށަހެޅުމުން ހައިކޯޓުން މިދިޔަ ސެޕްޓެމްބަރު މަހު މައްސަލަ ބޭރުކޮށްލީ ދައުލަތަށް އެ މައްސަލަ އިސްތިއުނާފް ކުރުމުގެ ހައިސިއްޔަތެއް ނެތް ކަމަށް ނިންމުމަށްފަހުއެވެ. އެ ހިސާބުން ދައުލަތުން އެ މައްސަލަ ހުށަހެޅީ ސުޕްރީމް ކޯޓަށެވެ.
ސުޕްރީމް ކޯޓުގައި މި މައްސަލަ މި ހަފްތާގައި ފެށުމަށް ތާވަލުކޮށްފައިވެއެވެ. މި މައްސަލަ ބައްލަވާ ސުޕްރީމް ކޯޓުގެ ބެންޗުގައި ހިމެނިވަޑައިގަންނަވަނީ ފަނޑިޔާރު ޢާއިޝާ ޝުޖޫން މުޙައްމަދު، ފަނޑިޔާރު ޢަލީ ރަޝީދު ޙުސައިން އަދި ފަނޑިޔާރު ޑރ. މުޙައްމަދު އިބްރާހީމްއެވެ.
