އަންހެން ޓީމުން ރަން މެޑަލް ދިފާއު ކުރީ ލީގު އުސޫލުން ކުޅުނު ހަތަރު މެޗު ވެސް ކާމިޔާބު ކޮށްގެންނެވެ. އިއްޔެ ކުޅުނު ފުރަތަމަ މެޗުގައި ސީޝެލްސް އާއި ދެވަނަ މެޗުގައި ރީޔޫނިއަން ވެސް ބަލިކުރީ ސީދާ ތިން ގޭމުންނެވެ.
ދިވެހި ޓީމުން މިއަދު ކުޅުނު ފުރަތަމަ މެޗުގައި މަޑަގަސްކަރަ ބަލިކުރީ 3-1 ގޭމުންނެވެ. އަދި ލީގު ފަހު މެޗުގައި މޮރީޝަސް ބަލިކުރީ ވެސް 3-1 ގޭމުންނެވެ.
ދިވެހި އަންހެން ޓީޓީ ޓީމުންވަނީ 2019 ގައި މޮރީޝަސްގައި އޮތް ގޭމްސްގެ ޓީމު އިވެންޓުން ރަން މެޑަލް ހޯދާފައެވެ. އަދި މި ފަހަރު ރަން މެޑަލް ދިފާއު ކުރުމާއެކު ޓީޓީ އަންހެން ޓީމު ވެގެންދާނީ ރާއްޖޭގައި ކުޅިވަރަކުން ރަން މެޑަލް ދިފާއު ކުރި ފުރަތަމަ ޓީމަށެވެ.
މިއަހަރު ވާދަކުރާ އަންހެން ޓީމުގައި، 2019 ވަނަ އަހަރު ވެސް ހިމެނުނު ދެ ކުޅުންތެރިން ހިމެނުނެވެ. އެއީ ފާތިމަތު ދީމާ އަލީ އާއި އާމިނަތު ރަފާ ނާޒިމް އެވެ. ކުރީ ފަހަރުގެ ޓީމުގައި ހިމެނުނު މުއީނާ މުހައްމަދާއި ފާތިމަތު ޖުމާނާ ނިމާލްގެ ބަދަލުގައި މިއަހަރު ޓީމުގައި ހިމެނުނީ ލައިސާ ފަތުހުﷲ އިސްމާއިލް އާއި އާމިނަތު ޝިއުރާ ޝަރީފް އެވެ.
