މަޑަގަސްކަރައިގައި ކުރިއަށްދާ ގޭމްސްގެ ފިރިހެން ޓީމުން ރިހި މެޑަލް ހޯދީ، އިވެންޓުގެ ފައިނަލުން މަޑަގަސްކަރައާ ވާދަކޮށެވެ. މިއީ ގޭމްސްގައި ދިވެހި ފިރިހެން ޓީޓީ ޓީމުން ރިހި މެޑަލް ހޯދި ފުރަތަމަ ފަހަރެވެ.
ފައިނަލް މެޗުގައި މަޑަގަސްކަރައާ ދެކޮޅަށް ކުޅުނު މެޗުގައި ދިވެހި ޓީމުގެ ތަރިއަކަށްވީ މުހައްމަދު ޝައްފާން އިސްމާއީލް އެވެ. ޝައްފާން ވަނީ ދެ ގޭމު ކާމިޔާބުކޮށްފައެވެ. ފުރަތަމަ ގޭމް ޝައްފާން ކާމިޔާބުކުރީ މަޑަގަސްކަރައިގެ ރަންދްރިއަނާޓޯންޑްރޯ އަތުން 3-2 އިންނެވެ. މި ގޭމުގެ ފުރަތަމަ ސެޓު 11-5 އިން ރަންދްރިއަނާޓޯންޑްރޯ ގެންދިޔަ ނަމަވެސް ޝައްފާން އަނެއް ދެ ސެޓު 5-11 އަދި 2-11 އިން ކާމިޔާބުކުރި އެވެ. މެޗުގެ ހަތަރު ވަނަ ސެޓު 11-0 އިން ރަންދްރިއަނާޓޯންޑްރޯ ގެންދިއުމުން ހަމަހަމަވި އެވެ. ނަތީޖާ ނެރެން ކުޅުނު ސެޓު ޝައްފާން ކާމިޔާބުކުރީ 6-11 އިންނެވެ.
މެޗުގެ ދެ ވަނަ ގޭމުން ރާއްޖޭގެ ތަޖުރިބާކާރު ކުޅުންތެރިޔާ މޫސާ މުންސިފް ވަނީ މަޑަގަސްކަރައިގެ ނަޓިވެލް ޖޮނަތަން އަތުން ސީދާ ތިން ސެޓުން ބަލިވެފަ އެވެ. ސެޓުތައް ޖޮނަތަން ގެންދިޔައީ 11-9، 11-7 އަދި 11-5 އިންނެވެ.
މެޗުގެ ތިން ވަނަ ގޭމުން ރާއްޖޭގެ އަހްޔަރް އަހުމަދު ހާލިދު ވަނީ މަޑަގަސްކަރައިގެ ރަޒަފިންރަލަމްބޯ ޒޯ ނަދާރް އަތުން 3-1 ސެޓުން ބަލިވެފަ އެވެ. ފުރަތަމަ ސެޓު 11-6 އިން އަހްޔަރު ކާމިޔާބުކުރި ނަމަވެސް މަޑަގަކަސްރަ ކުޅުންތެރިޔާ ވަނީ އަނެއް ތިން ސެޓު 9-11، 4-11 އަދި 8-11 އިން ކާމިޔާބުކޮށްފަ އެވެ.
މެޗުގެ ހަތަރު ވަނަ ގޭމު ކާމިޔާބުކޮށްގެން މަޑަގަސްކަރަ އަށް ރަން މެޑަލް ކަށަވަރުކުރެވެން އޮތް ނަމަވެސް ރާއްޖޭގެ ޝައްފާން ވަނީ ޖޮނަތަން އަތުން 3-1 އިން މޮޅުވެ އުއްމީދެއް ހޯދައިފަ އެވެ. ފުރަތަމަ ސެޓު ޝައްފާން ކާމިޔާބުކުޜީ 11-8 އަދި 12-10 އިންނެވެ. އަނެއް ދެ ސެޓު 6-11 އަދި 8-11 އިން ކާމިޔާބުކޮށް ޖޮނަތަން އެއްވަރުކުރި އެވެ. އެކަމަކު ޝައްފާން ވަނީ 11-6 އިން ފަހު ސެޓު ކާމިޔާބުކޮށް ގޭމުން ރާއްޖެ މޮޅުކޮށްދީފަ އެވެ.
މަޑަގަސްކަރަ ރަން މެޑަލް ހޯދި ދެ ޓީމު 2-2 ގޭމުން އެއްވަރުވުމުން ނަތީޖާ ނެރެން ކުޅުނު ފަހު ގޭމް 3-1 އިން ކާމިޔާބުކޮށްގެންނެވެ.
ފިރިހެން ޓީޓީ ޓީމުން ރިހި މެޑަލް ހޯދިއިރު، އަންހެން ޓީޓީ ޓީމުންވަނީ ރަން މެޑަލް ހޯދާފައެވެ.
