ކުޑަ ކުއްޖަކާމެދު ބަދުއަހުލާގީ އަމަލު ހިންގި ކަމަށް ތުހުމަތު ކުރެވޭ މީހަކު އެމްޑީޕީގެ ކެމްޕޭނުގައި ހަރަކާތްތެރިވަމުން އަންނަ ވާހަކަ އާ ގުޅޭގޮތުން މީޑިޔާ އަށް މައުލޫމާތު ދެއްވައި މާރިޔާ މިއަދު ވިދާޅުވީ އެމްޑީޕީގެ އެއްވެސް ކެމްޕޭނެއްގައި މިފަދަ އަމަލު ހިންގާ ފަރާތަކަށް އެއްވެސް ފުރުސަތެއް ނެތް ކަމަށެވެ.
މާރިޔާ މިއަދު ވިދާޅުވީ އެމްޑީޕީން ކުރިއަށްދާނީ ރަނގަޅު މަގު އިހްތިޔާރުކޮށް ރަނގަޅު ކަންކަމުގެ ތެރެއިން ކަމަށެވެ. އަދި ވިދާޅުވީ މީސްމީޑިއާގެ ޒަރިއްޔާއިން އެފަދަ ތުހުމަތުތަކެއް ކުރެވިފައިވާ މީހަކު ކެމްޕޭނުގައި ހަރަކާތްތެރިވަމުން އަންނަ ކަމަށާއި، އެފަދަ ފަރާތެއް އެޕާޓީގެ ކެމްޕޭނުގައި ނޫޅޭނެ ކަމުގެ ފުރިހަމަ ޔަގީންކަން ރައްޔިތުންނަށް އަރުވާ ކަމަށެވެ.
"ކުޑަ ކުއްޖަކާ ބެހުނު ކަމުގެ ތުހުމަތު ކުރެވޭ މީހަކު ކެމްޕޭނުގައި އުޅެޔޭ ކިޔައިގެން އެބަ އަޑު ފެތުރޭ. އަޅުގަނޑު ދަންނަވާލަން ބޭނުން ވަނީ ރައްޔިތުންނަށް އެފަދަ ފަރާތެއް މި ކެމްޕޭނުގައި ނޫޅޭނެޔޭ. އެމްޑީޕީ ކުރިއަށް ދާނީ ރަނގަޅު މަގުން ރަނގަޅު ކަންކަމުގެ ތެރެއިން." މާރިޔާ މިއަދު ވިދާޅުވި އެވެ.
މާރިޔާ އެ ވިދާޅުވާ ފަރާތަކީ ދާދި ފަހުން އެމްޑީޕީން ހުޅުމާލޭގައި ބޭއްވި އެޕާޓީގެ ބޮޑު ޖަލްސާއެއްގައި ލަވައެއް ހުށައަޅައިދިނުމަށް އައި އިބްރާހިމް ޝާހީން ނަމަކަށް ކިޔާ މީހެއްގެ ވާހަކަ އެވެ.
ޝާހީންގެ މައްޗަށް ދައުލަތުން ދައުވާކޮށްފައި ވަނީ 2017 ވަނަ އަހަރުން ފެށިގެން އެކި ދުވަސްތަކުގެ މަތިން އިތުބާރު ކުރެވޭ މަގާމެއްގައި ހުރެ ކުޑަ ކުއްޖަކާމެދު ޖިންސީ އަމަލު ހިންގި ކަމުގެ ކުށުގެ ދައުވާ އެވެ. އަދި މި މައްސަލައިގެ އޭނާގެ މައްޗަށް ހުކުމެއް ކަނޑައަޅާފައެއްވެސް ނުވެ އެވެ.
ހުޅުމާލޭގައި އެމްޑީޕީން ބޭއްވި އެޕާޓީގެ ޖަލްސާގައި ޝާހީން ލަވަކިޔަން ހުންނަ ފޮޓޯ އާއި ވީޑިއޯ މީސްމީޑިޔާގައި ދައުރުވުމުން އެކި ފަރާތްތަކުން ވަނީ ފާޑިކިއުންތައް އަމާޒުކޮށްފަ އެވެ.
