ހިތަދޫގައި އަލަށް އިމާރާތްކުރެވުނު ފެނަކަ ކޯޕަރޭޝަން ލިމިޓެޑް (ފެނަކަ) ގެ އާ އޮފީސް އިމާރާތް ރައީސް ސޯލިހު ހުޅުވައިދެއްވާފައިވަނީ ހައްދުންމަތީގެ ރަށްތަކަށް ކުރެއްވި ރިޔާސީ ކެމްޕެއިން ދަތުރުފުޅުގެ ތެރެއިން އަންގާރަ ދުވަހުގެ މެންދުރުފަހު އެ ރަށުގައި ބޭއްވި ހާއްސަ ރަސްމިއްޔާތެއްގައެވެ.
ހިތަދޫގައި އަލަށް ހުޅުވި އޮފީސް އިމާރާތާ ގުޅޭގޮތުން ފެނަކައިން ބުނީ، މިއީ އެ ކޯޕަރޭޝަނުގެ 27 ވަނަ އޮފީސް އިމާރާތް ކަމަށެވެ. ފެނަކައިން ބުނެފައިވަނީ މީގެކުރިން އެ ރަށުގައި އޮފީހެއްގެ ގޮތުގައި ބޭނުން ކުރަމުން އައި އިމާރާތަށް 18 އަހަރުވެފައިވާ ކަމަށެވެ.
ހިތަދޫގެ 18 އަހަރުވީ ބާ އޮފީސް - ފޮޓޯ:ފެނަކަ
ހިތަދޫގައި އިންޖީނުގޭގެ އޮފީހެއްގެ ގޮތުގައި މީގެ ކުރިން ބޭނުން ކުރަމުން އައީ 12x14 ފޫޓުގެ އޭރިއާއެއް ކަމަށް ފެނަކައިން ބުނެއެވެ. ފެނަކައިން ބުނީ އެ ތަނުގައި މަސައްކަތް ކުރެވެނީ ހަތަރު މުވައްޒަފުންނަށް ކަމަށެވެ.
ފެނަކައިން ބުނި ގޮތުގައި ހިތަދޫގައި އަލަށް އިމާރާތްކުރި އޮފީސް އިމާރާތަކީ 43x39 ފޫޓުގެ އިމާރާތެއް ކަމުގައެވެ. އެ އިމާރާތުގައި 30 މުވައްޒަފުންނަށް މަސައްކަތް ކުރެވޭނެ ޖާގަ ތަނަވަސް ކުރެވިފައިވާ ކަމަށް އެ ކޯޕަރޭޝަނުން ބުނެއެވެ.
ފެނަކައިން ބުނީ އަލަށް ހުޅުވި އޮފީސް އިމާރާތުގައި ރިސެޕްޝަނަކާއި ލޮބީއަކާއި މެނޭޖަރު ރޫމަކާއި ޕޭންޓްރީއަކާއި ފާހާނައަކާއި މީޓިން ރޫމަކާއި ގެސްޓް ރޫމެއްގެ އިތުރުން ސްޓޯރެއް ހުންނަ ކަމަށެވެ.
ހިތަދޫގައި އަލަށް އިމާރާތްކުރެވުނު ފެނަކަ އާ އޮފީސް އިމާރާތް - ފޮޓޯ:ފެނަކަ
މީގެ ކުރިން ބޭނުން ކުރަމުން އައި އޮފީސް ހުރީ ރަށުގެ ބަނދަރުމަތީގައި ހުރި އިންޖީނުގެ އިމާރާތުގައި ނަމަވެސް އަލަށް ބިނާކުރި އޮފީސް އިމާރާތް ހުންނާނީ ކައުންސިލް އިދާރާ ކުރިމަތީގައި އޮންނަ ކުރީގެ ޕާކުތެރޭގައި ކަމަށް އެ ކޯޕަރޭޝަނުން ބުނެއެވެ.
