މަޑަގަސްކަރައިގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސްގައި މިހާތަނަށް ދިވެހި ޓީމުތަކުންވަނީ 18 މެޑަލް ހޯދާފައެވެ. އެއާއެކު 2019 ވަނަ އަހަރުގެ ރެކޯޑް މިހާރުވެސް މުގުރާލާފައިވާއިރު، ދިވެހި އެތްލީޓުން އަދިވެސް މި ގޭމްސްގައި މެޑަލް ހޯދުމުގެ ފުރުސަތު އެބައޮތެވެ.
މި ފަހަރުގެ ގޭމްސްގައި މިހާތަނަށް ހޯދާފައިވާ މެޑަލްތަކަށް ބަލާއިރު، ޓޭބަލް ޓެނިހުން ފަސް މެޑަލް ހޯދާފައިވެއެވެ. އޭގެ ތެރޭގައި ތިން ރަން މެޑަލްއާ، ދެ ރިހި މެޑަލް އަދި ލޯ މެޑަލްއެއް ހިމެނެއެވެ.
މުޅިން އަލަށް ގޭމްސްގައި ވާދަކުރާ ޓައެކްވޮންޑޯ ޓީމުންވެސް ފަސް މެޑަލް ހޯދާފައިވެއެވެ. ޓައެކްވޮންޑޯ އިން ހޯދާފައިވަނީ ދެ ރިހި މެޑަލްއާ، ތިން ލޯ މެޑަލްއެވެ.
ބާސްކެޓް ބޯޅަ ޓީމުތަކުންނާ، ބެޑްމިންޓަން ޓީމުތަކުން އަދި ޕެރަ އެތްލެޓިކްސް، މިއިން ކޮންމެ ކުޅިވަރަކުން ދެ މެޑަލް ހޯދާފައިވެއެވެ. ބާސްކެޓުން ހޯދީ ދެ ލޯ މެޑަލްއެވެ. ބެޑްމިންޓަނުން ދެ ރިހި މެޑަލްއެވެ. އަދި ޕެރަ އެތްލެޓިކްސްއިންވެސް ދެ ލޯ މެޑަލްއެވެ.
މީގެ އިތުރުން އެތްލެޓިކްސްއިންވެސް ލޯ މެޑަލްއެއް މިހާތަނަށް އައިއިރު ހޯދާފައިވެއެވެ.
މި ފަހަރުގެ ގޭމްސްގައި މިހާތަނަށް އައިއިރު، ރާއްޖޭން 2019 ވަނަ އަހަރުގެ ރެކޯޑް މުގުރާލާފައިވާއިރު، އަދިވެސް އިތުރު މެޑަލްތައް ހޯދާނެ ކަމަށް ބެލެވެއެވެ. މެޑަލްތަކުގެ އިތުރުން ގައުމީ ރެކޯޑްތައްވެސް ގޭމްސްގައި މިހާތަނަށްވަނީ އާކޮށްފައެވެ.
