މަޑަގަސްކަރާގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ 200 މީޓަރު ދުވުމުގެ ފައިނަލަށް ހަސަން ސާއިދު، ދަތުރުކުރިއިރު، ދިވެހި އެތްލީޓް މުހައްމަދު މިންހާލް ޝާމިން އަދި އާމިނަތު ލަޔާނާ މުހައްމަދުވެސްވަނީ ފައިނަލުން ފުރުސަތު ހޯދާފައެވެ.
ފިރިހެނުންގެ ހީޓު ދޭއްގައި ވާދަކޮށް ރާއްޖޭގެ އެންމެ ބާރު ދުވުންތެރިޔާ، ސާއިދު ރޭސް ނިންމީ ތިން ދުވުންތެރިންގެ ތެރެއިން ދެ ވަނައިގަ އެވެ. ސާއިދުގެ ޓައިމިން އަކީ 21.64 ސިކުންތެވެ. ސާއިދު ވާދަކުރި ހީޓުގެ އެއް ވަނަ ހޯދީ މޮރިޝަސްގެ ޖޯޝަން ރޯއި އެވެ. އޭނާގެ ޓައިމިން އަކީ 21.57 ސިކުންތެވެ.
ރާއްޖޭން ދެން ފައިނަލަށް ދަތުރުކުރި މިންހާލްގެ ވާދަކުރީ ހީޓު އެކެއްގަ އެވެ. މިންހާލް ރޭސް ނިންމީ 22.41 ސިކުންތުންނެވެ. މިންހާލް ދިޔައީ ހަތް އެތުލީޓުން ވާދަކުރި އެ ހީޓުގެ ހަތަރު ވަނަ އެވެ. އެ ހީޓުގެ އެއް ވަނަ އަށް ދިޔައީ މޮރިޝަސްގެ ބީބީ ގެރީ ޖެރެލް އެވެ.
ރާއްޖޭގެ ސްޕްރިންޓަރު، އިބްރާހިމް ނާހިލް ނިޒާރު ވަނީ 200 މީޓަރު ދުވުމުގެ ހީޓު ތިނެއްގައި ވާދަކޮށް ފަސް ވަނައިގައި ނިންމައިލައިފަ އެވެ. ނާހިލް ރޭސް ނިންމީ 22.75 ސިކުންތުންނެވެ. އެ ހީޓުގެ އެއް ވަނަ އަށް ދިޔައީ ކޮމޮރޯސްގެ މާރޫފޫ ހަކީމް އެވެ. އޭނާގެ ޓައިމިން އަކީ 21.51 ސިކުންތެވެ.
ލަޔާނާ ފައިނަލަށް ދަތުރުކުރީ ހީޓު އެކެއްގައި ވާދަކޮށް، ހަތް ދުވުންތެރިންގެ ތެރެއިން ހަތަރު ވަނަ އަށް ނިންމައިގެންނެވެ. ލަޔާނާގެ ޓައިމިން އަކީ 25.93 ސިކުންތެވެ.
