ދަ ޑިމޮކްރެޓްސްގެ މައި ހަރުގެ، ހައުސް އޮފް ޑިމޮކްރެޓްސްގައި ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ 2018 ވަނަ އަހަރު ދަރަނި އެކުލަވާލުމަށް ރައީސް ސޯލިހު އިންތިހާބުވުމާ އެކުގައި ތަކުރާރުކޮށް އެދިވަޑައިގެންނެވި ކަމަށެވެ. އޭރު އޮތް ދަރަނި އެ އޮތް ގޮތަށް ބޭއްވުމަކީ ނުރައްކާތެރި ކަމެއް ކަމަށާއި ދަރަނި އަލުން އަނބުރާ އެކުލަވާލުމަށް މަސައްކަތް ކުރުމަށް ރައީސް ސޯލިހުގެ އަރިހުން އެދިވަޑައިގެންނެވި ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވެފައި ވަނީ ރައީސް އަބްދު ﷲ ޔާމީން ވިއްކަވާފައި އޮތް ސަނީ ސައިޑް ބޮންޑް (250 މިލިއަން ޑޮލަރު) 2020 ވަނަ އަހަރަށް މެޗުއާ ވާ ކަމަށާއި އެ ބޮންޑު މެޗުއާވުމުގެ ކުރީގައި އެ ދަރަނި އަލުން އަނބުރާ އެކުލަވާލި ނަމަ، ސްކޫކް ބޮންޑު ވިއްކަން ނުޖެހުނީސް ކަމަށެވެ.
އެ ޖަލްސާގައި ވާހަކަފުޅުދައްކަވަމުން ރައީސް ނަޝީދު ވަނީ ޑިމޮކްރެޓިކްސްގެ ރިޔާސީ ކެންޑިޑޭޓް އިލްޔާސް ލަބީބްގެ ސަރުކާރެއްގައި ރާއްޖޭގެ ދަރަނި އަލުން އެކުލަވާލައި، އެ މައްސަލަ ހައްލުކުރާނެ ކަމަށް ފާހަގަކުރައްވާފައެވެ. ދައުލަތުގެ ދަރަނި އަލުން އަނބުރާ އެކުލަވާލުމަށް އިލްޔާސް ވައުދުވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ 2026 ވަނަ އަހަރު އާމްދަނީއަށް ވުރެ އެތައް ގުނައެއް އިތުރަށް ދަރަނި އަދާކުރުމަށް ދައްކަން ޖެހޭ ކަމަށާއި ދައުލަތުގައި އެ އަދަދަށް ފައިސާ ނެތް ކަމަށެވެ. ފަހު ވަގުތު އެ ދަރަނި އެހެން ގައުމަކުން ދައްކައިދިން ނަމަވެސް ދަރަނިން ސަލާމަތް ނުވެވޭނެ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވި ގޮތުގައި 2020 ވަނަ އަހަރު ދަރަނިން ސަލާމަތްވެވުމުގެ ފުރުސަތު ލިބިފައިވަނިކޮށް، ސްކޫކް ބޮންޑު ވިއްކައިގެން އަނެއްކާ ބޮޑަށް މިވަނީ ދަރަނިވެރިވެފައި ކަމުގައެވެ.
