ރައީސް ސޯލިހުގެ މިދަތުރުފުޅުގައި، އެމަނިކުފާނާއެކު، މޯލްޑިވްސް ޑިވެލޮޕްމަންޓް އެލައަންސް (އެމްޑީއޭ) އާއި އަދާލަތު ޕާޓީގެ އިސްވެރިންގެ އިތުރުން، ސަރުކާރުގެ ބައެއް ވަޒީރުންނާއި، އެމްޑީޕީގެ ބައެއް އިސް ފަރާތްތަކުން ބައިވެރިވެވަޑައިގަންނަވައެވެ.
މިއަހަރުގެ ރިޔާސީ އިންތިހާބުގައި މިހާތަނަށް އެއްމެ ގިނަ ރަށްތަކަށް ވަޑައިގެންނެވި ކެނޑިޑޭޓަކީ ރައީސް ސޯލިހު ކަން ފާހަގަކޮށްލެވެއެވެ. އެގޮތުން މިހާތަނަށް، ރިޔާސީ ކެމްޕެއިނަށް 100 އަށްވުރެ ގިނަ ރަށްތަކަށް ވަޑައިގަންނަވާފައިވެއެވެ. އޭގެ ތެރޭގައި، ހއ. ށ. ނ. ރ. ބ. ޅ. އއ. ވ، މ، ދ. ލ. ގއ. ގދ. އަދި ފުވައްމުލައް ސިޓީ ހިމެނެއެވެ.
މީގެ ކުރިންވެސް ރައީސް ސޯލިހު ވަނީ ރިޔާސީ ކެމްޕެއިނަށް ހދ.އަތޮޅަށް ވަޑައިގެންފައެވެ.
ރިޔާސީ އިންތިހާބުގެ ވޯޓުލުމަށް 6 ދުވަހަށް ވެފައިވާއިރު، ރައީސް ސޯލިހު ގެންދަވަނީ، ބޮޑު އަގުލަބިއްޔަތަކާއެކު، ކުރިއަށް އޮތް ރިޔާސީ އިންތިހާބު ކާމިޔާބު ކުރައްވާނެކަމަށް އެމަނިކުފާނު ވިދާޅުވާ ވިދާޅުވުން ތަކުރާރުކުރައްވަމުންނެވެ.
