ރިޔަސީ އިންތިހާބަށް ހދ.އަށް ކުރައްވަމުން ގެންދަވާ ދަތުރުފުޅުގައި ނައިވާދޫގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އިދިކޮޅު ފަރާތްތަކުން ނުކުމެ އަނިޔާވެރިކަން ނިންމުމަށް ކަމަށް ބުނެ ކެމްޕޭނު ކުރަމުންދާ އިރު އެވާހަކަތައް ގަބޫލު ކުރަން ދަތި ކަމަށެވެ. އަދި އެ އުޅެނީ އަނެއްކާ ވެސް ރާއްޖެ އެ ބިރުވެރިކަމުގެ ތެރެއަށް ގެންދަން ކަމަށް މީހުންނަށް ހީވާ ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ޕީޕީއެމު/ޕީއެންސީގެ ވެރިކަމެއްގައި ބިރުވެރިކަން އޮތީ ހަމައެކަނި ސިޔާސީ މީހުންނަށް ނޫން ކަމަށެވެ. ދީނީ ބޭފުޅުންނާއި، ވިޔަފާރިވެރިންނާއި، ނޫސްވެރިންނާއި އެތައް ބަޔަކަށް ބިރުވެރިކަން އޮންނާނެ ކަމަށާއި، ކުރިން ވެސް ޕީޕީއެމު ސަރުކާރުގައި އާއިލާތައް ހުރި ގޮތަށް ޖަލުގައި ބޭތިއްބި ކަމަށެވެ.
"އެއީ އަނބުރާ އަޅުގަނޑުމެން އެއްވެސް ރައްޔިތަކު ދެކެން ހެޔޮވާނެ ދުވަހެއް ނޫން. އަޅުގަނޑުމެން ވިސްނާ ފިކުރު ކުރަން ވާނެ. އެއަށްފަހު ތިބޭފުޅުން 2018 ވަނަ އަހަރު ނުކުމެވަޑައިގެން މުޅި ރާއްޖެ އެކީގަ އެކަން ބަދަލުކޮށްފިން. މާޒީއަށް އެ ދުވަސް ދޫކޮށްލައިފިން. ދެން އެދުވަސް އަނބުރާ ރުޖޫއަވާކަށް ނޭދޭނެ،" ރައީސް ސޯލިހު ވިދާޅުވިއެވެ.
2018 ވަނަ އަހަރު ރައްޔިތުން ނުކުމެ އެދުނީ މިނިވަންކަމަށް ކަމަށާއި އެމިނިވަންކަން ސިޔާސީ ފަރާތްތަކަށާއި ނޫސްވެރިންނާއި ވަކިވަކި ފަރުދުންނަށް ތަންމިނަށް ހުޅުވާދީފައިވާ ކަމަށް ރައީސް ސޯލިހު ވިދާޅުވިއެވެ. އެމަނިކުފާނުގެ ވެރިކަމުގައި ވެސް ހަލަބޮލިކުރުމަށް އެތައް މަސައްކަތްތަކެއް އެތެރެއިންނާއި ބޭރުން ކުރި ކަމަށް ރައީސް ސޯލިހު ވިދާޅުވިއެވެ. އެ ފުރުސަތު ނުދެއްވީ ކަމަށާއި ސިޔާސީ ހަލަބޮލިކަމަކަށް ދިޔަ ނަމަ ރައްޔިތުންނަށްވީ ވައުދުތައް ނުފުއްދޭނެ ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ނައިވާދޫއަށް ވެވަޑައިގެންނެވި ވައުދުތައް:
1. ބިން ހިއްކާ ރިވެޓްމެންޓު ޖެހުން،
2. ބޯހިޔާވަހިކަން ފޯރުކޮށްދިނުން،
3. ބޮޑެތި މަގުތައް ތާރު އަޅައިގެން ޒަމާނީ ފެންވަރަށް ހެދުން،
4. ޒުބާނުން ބޭނުންވާ ގޮތަށް ތަފާތު ކުޅިވަރުތައް ކުޅޭނެ ވަސީލަތް ގާއިމު ކުރުން
