ޕީޕީއެމުން މިރޭ ނެރުނު ބަޔާނެއްގައި ބުނެފައިވަނީ ފާރިސް ރައީސް ޔާމީނާއި ބައްދަލު ކުރި ކަމަށް ބުނެ ދޮގު ހަބަރު ފަތުރަމުން ދަނީ ޕީޕީއެމް/ޕީއެންސީގެ ކެންޑިޑޭޓު ޑރ.މުހައްމަދު މުއިއްޒުއަށް އޮތް ތާއީދު ކުޑަކޮށް، ބައިބައިކޮށްލުމަށް ކަމަށެވެ.
ފާރިސްއަކީ ރައީސް ޔާމީނަށް ބޮޑު ބޭބެ ވިދާޅުވާ ބޭފުޅެކެވެ.
ރައީސް ޔާމީނުގެ ސަރުކާރާ ދެކޮޅަށް މަސައްކަތް ކުރުމުގެ ސަބަބުން ހައްޔަރުވެ، ޖަލުގައި ގިނަ ދުވަސްތަކެއް ފާރިސް ހޭދަ ކުރައްވަން ޖެހިވަޑައިގެންނެވިއެވެ. ފާރިސްގެ އިތުރުން ރައީސް ޔާމީންގެ ބޭބޭފުޅު ރައީސް މައުމޫނު އަބްދުލް ގައްޔޫމާއި، އެމަނިކުފާނުގެ ދަރިކަނބަލުން ޔުމްނާ މައުމޫނުގެ ފިރިކަލުން ނަދީމު ވެސް ޖަލުގައި ގިނަ ދުވަސްތަކެއް ހޭދަ ކުރެއްވިއެވެ.
ރައީސް ޔާމީނާއި އުފެދުނު ހިޔާލު ތަފާތުވުންތަކުގައި ރައީސް މައުމޫނު ނުކުމެވަޑައިގެން އެމްއާރުއެމްގެ ނަމުގައި އާ ޕާޓީއެއް އުފައްދާފައިވާ އިރު ފާރިސްއަކީ ޕީޕީއެމް އުފެއްދުމުގައި އިސްކޮށް ހަރަކާތްތެރިވެވަޑައިގެންނެވި ބޭފުޅެކެވެ.
