ހއ. ދިއްދޫގައި ކުރިއަށްދިޔަ ކެމްޕެއިން ރެލީއެއްގައި ވާހަކަފުޅުދައްކަވަމުން އަމްރު ވިދާޅުވީ ދަ ޑިމޮކްރެޓްސްގެ ސަރުކާރެއްގައި، ސަރުކާރުން ގެރެންޓީ ދީގެން ރިސޯޓު ހެދުމަށް ލޯނު ނެގޭނީ ހަމައެކަނި މުއްސަނދި މަހުޖަނުންނަށް އެކަނި ނޫން ކަމަށާއި އެ ފުރުސަތު މުޅި ދިވެހި ރައްޔިތުންނަށް ހުޅުވާލާނެ ކަމަށެވެ.
"ސަރުކާރު ގެރެންޓީ ވާ ގޮތަށް އަޅުގަނޑުމެން އިރާދަކުރެެއްވިއްޔާ ގެސްޓްހައުސް އެޅުމަށް ފައިނޭންސް ލިބޭނެ ގޮތް ހަމަޖައްސާނަން،" ބޯ ވިއްސާރައިގައި ވާހަކަފުޅުދައްކަވަމުން އަމްރު ވިދާޅުވިއެވެ.
މީގެ އިތުރުން އަމްރު ވިދާޅުވީ ރޯރޯ ފެރީ ތައާރަފް ކުރައްވާނެ ކަމަށާއި ހަމައެކަނި ސްޕީޑް ފެރީގައި މީހުން ދަތުރުކޮށްގެން މިހާރު ފަރުޖެއްސެން ނެތް ކަމަށެވެ. އެގޮތުން އެއްރަށުން އަނެއް ރަށަށް މުދާ ގެންދެވޭނެ އިންތިޒާމް މި ފެރީތަކުން ހަމަޖެހިގެންދާނެ ކަމަށް އޭނާ ވިދާޅުވިއެވެ.
ކުރީގެ ރައީސް، ރައީސް މުހައްމަދު ނަޝީދުގެ އިސްވެހުރެ އުފައްދާފައިވާ ދަ ޑިމޮކްރެޓްސްއިން ރައްޔިތުންނަށް ގިނަ ވައުދުތަކެއް ވަމުންދާއިރު، މީހުން ދިރިއުޅޭ ރަށްރަށުގައި ޓޫރިސްޓް ގެސްޓް ހައުސް ބިނާކޮށް ހިންގުމުގެ ހުއްދަ ދީފައި ވަނީ އެމަނިކުފާނު ވެރިކަމުގައެވެ.
