އޭއެފްސީ 23 އަހަރުން ދަށުގެ ކޮލިފައިންގައި ރާއްޖެ ހިމެނިފައި އޮތީ އިންޑީޔާއާ، ޗައިނާ އަދި ޔޫއޭއީއާއެކު ގްރޫޕް ޖީގައެވެ. މި ގްރޫޕްގެ މެޗުތައް ޗައިނާގައި ކުޅެން ހަމަ ޖައްސާފައިވާއިރު، ރާއްޖޭން ކުޅެން ޖެހޭ ފުރަތަމަ މެޗު މިއަދު އިންޑިޔާއާ ދެކޮޅަށް ކުޅޭ ގޮތަށް އޮއްވާ ރާއްޖޭންވަނީ މުބާރާތުން ވަކިވެފައެވެ.
މުބާރާތުން ދިވެހި ޓީމު ވަކިވާން ޖެހުނު ސަބަބާ ގުޅޭ ގޮތުން އެފްއޭއެމުން ބުނީ، މިދިޔަ މަހުގެ ހަތްވަނަ ދުވަހު، މި މެޗުތަކާ ގުޅޭ މައުލޫމާތު ޔޫތު މިނިސްޓްރީއާ ހިއްސާކޮށް ޓިކެޓްގެ ހަރަދުތަކާއި އެހެނިހެން މައުލޫމާތު ހިއްސާކޮށްފައިވާނެ ކަމަށެވެ. އެހެންނަމަވެސް އެ ފައިސާގެ އިންތިޒާމްތައް ފަހުވަގުތާ ހަމައަށް އެފްއޭއެމަކަށް ހަމައެއް ނުޖެއްސުނެވެ.
އެކަންތަކާ ގުޅިގެން ކުޅިވަރު މިނިސްޓްރީން މިއަދު ބުނީ، އެ ފައިސާ ހަމަ ނުޖެހުމުގެ ޒިންމާ މިނިސްޓްރީން ނަގަން ނުޖެހޭނެ ކަމަށެވެ.
މިނިސްޓްރީގެ އެހީއާ ނުލައި ޓިކެޓްގެ އަގަށްވާ މިލިއަނެއްހާ ރުފިޔާ ފަހު ވަގުތު އެފްއޭއެމަށް ހޯދުނު ނަމަވެސް ފައިސާ ލިބުނުލެއް ލަސްވުމުން ދަތުރުގެ އިންތިޒާމްތައް ހަމަ ނުޖެހުނު ކަމަށް އެފްއޭއެމުން ބުންޏެވެ. ފަހު ވަގުތު ފައިސާ ހަމަ ޖެހުމުން މާދަމާ އިންޑިޔާއާ ދެކޮޅަށް ކުޅެން އޮތް މެޗު ފަސް ކުރަންވެސް އެފްއޭމުން މަސައްކަތް ކުރިއެވެ. އެހެންނަމަވެސް އެކަން އެ ގޮތަށް ނުވުމުން އެންމެ ފަހު ވަގުތު މުބާރާތުން ވަކިވީއެވެ.
