އެމްޓީސީސީން ބުނީ މިއަދު އެ ކުންފުނީގެ ކަށަވަރު ޝޯރޫމްގައި ބޭއްވި ހަފުލާއެއްގައި އިންޖީނުތައް ޓްރޭނިން އިންސްޓިޓިއުޓްތަކުގެ ވެރިންނާ ހަވާލުކޮށްދެއްވީ އެ ކުންފުނީގެ ޗީފް އެގްޒެކެޓިވް އޮފިސަރު އާދަމް އާޒިމް ކަމަށެވެ. މި އިންޖީނުތައް ހަދިޔާ ކުރެވުނު ޓްރޭނިން އިންސްޓިޓިއުޓްތަކަކީ ދިވެހިރާއްޖޭގެ ގައުމީ ޔުނިވާސިޓީގެ ފެކަލްޓީ އޮފް އިންޖިނިއަރިން، މޯލްޑިވްސް ޕޮލިޓެކްނިކް، ޓެކްނިކަލް އެންޑް ވޮކޭޝަނަލް އެޑިއުކޭޝަން ސެންޓަ، ވިލާ ކޮލެޖް، މޯލްޑިވްސް އިންސްޓިޓިއުޓް އޮފް ޓެކްނޮލޮޖީ، އައިލެންޑް އިންސްޓިޓިއުޓް އޮފް ޓާޝަރީ އެޑިއުކޭޝަން އަދި މޯލްޑިވްސް ނޭޝަނަލް ޑިފެންސް ފޯސް ކަމަށް އެމްޓީސީސީން ބުނެއެވެ. އެމްޓީސީސީން ބުނެފައިވަނީ އެ ކުންފުންޏާއި ޔަންމާ ކުންފުނިން ގުޅިގެން ހަދިޔާ ކުރެވުނު މި 11 އިންޖީނުގެ ޖުމްލަ އަގަކީ ހަތަރު މިލިއަން ރުފިޔާ ކަމަށެވެ.
އެމްޓީސީސީގެ ސީއެސްއާރުގެ ދަށުން ޔަންމާ އިންޖީނު ޓްރޭނިން އިންސްޓިޓިއުޓްތަކަށް ހަދިޔާކުރުން - ފޮޓޯ:އެމްޓީސީސީ
އެމްޓީސީސީއަކީ އަބަދުވެސް ފަންނީ ޒުވާނުން ތިބި ޖީލެއް ބިނާކުރުމަށް ބާރު އަޅާ އެހީތެރިވެދޭ ކުންފުންޏެކެވެ. މި އިންޖީނުތައް ހަދިޔާ ކުރެވުނީ ރާއްޖޭގައި މެރިން ދާއިރާއިން ޒުވާން މެކޭނިކުން ތަމްރީނުކޮށް މި ދާއިރާ ފުޅާކުރުމާ އަދި ހާއްސަކޮށް ޔަންމާ އިންޖީނު މަރާމާތުކޮށް ދިމާވާ މައްސަލަތައް ދެނެގަނެ، އަހުލުވެރިވެފައިވާ ގިނަ ޒުވާނުންތަކެއް ރާއްޖޭގެ އެކިކަންކޮޅުތަކުން ތަމްރީނުކުރުމުގެ މަގުސަދުގައި ކަމަށް އެމްޓީސީސީން ބުނެއެވެ.
އެމްޓީސީސީން ބުނި ގޮތުގައި ރިޔާތައް ތިރިކޮށް، ދިވެހި އޮޑިތަކުގައި އިންޖީނު އަޅަންފެށީ 1973 ވަނަ އަހަރު ކަމުގައެވެ. އޭރު ސަރުކާރުން ހިންގަމުންދިޔަ "މޯލްޑިވްސް އިންޖީނު ސާވިސް ސެންޓަރު" އެމްޓީސީސީގެ ދަށަށް ގެނެސް "އެމްޓީސީސީ ސޭލްސް ސެންޓަރު" ގެ ނަމުގައި ހިންގަން ފެށި ކަމަށް އެ ކުންފުނިން ބުނެއެވެ. އެމްޓީސީސީން ބުނީ އޭރުގެ ސަރުކާރުގެ ބެލުމުގެ ދަށުން ކުރިއަށް ގެންދިޔަ އޮޑިދޯނިފަހަރުގެ އިންޖީނު އެޅުމުގެ ހުރިހާ ކަމެއް އެ ކުންފުނީގެ ދަށަށް ބަދަލުކުރެވުނު ކަމަށެވެ. ކުންފުނީގެ ޅަފަތުގައި ފޯރުކޮށްދެމުންދިޔަ ހިދުމަތްތަކުގެ ތެރޭގައި ދިވެހި މަސްވެރި އުޅަނދުފަހަރަށް ހާއްސަކޮށް ޔަންމާ އިންޖީނު ވިއްކުމާއި އިންޖީނު އަޅައިދިނުން އަދި މަރާމާތު ކުރުމުގެ ހިދުމަތް ހިމެނޭ ކަމަށް އެމްޓީސީސީން ބުނެއެވެ.
އެމްޓީސީސީން ބުނެފައިވަނީ އިންޖީނުލީ އޮޑީގެ ފަސޭހަތަކާ އެކު މަސްވެރިކަމާއި ދަތުރުފަތުރުގެ ސިނާއަތް ފުޅާވެ ކުރިއެރުމުގެ ސަބަބުން ވިޔަފާރި އާއި އިގުތިސޯދީ ހަރަކާތްތައް ކުރިއަރައި، ދިރިއުޅުމުގެ ހާލަތާއި ވައްޓަފާޅި ބަދަލުވާން ފެށި ކަމަށެވެ. އޭރު އަލަށް ފެށުނު ޓޫރިޒަމްގެ ދާއިރާ ތަރައްގީވުމުގައި އިންޖީނު އެޅި އުޅަނދުފަހަރުގެ ދަތުރުތައް މުހިންމު ދައުރެއް އަދާކުރި ކަމަށް އެމްޓީސީސީން ބުނެއެވެ. އެމްޓީސީސީން ބުނި ގޮތުގައި ފުރަތަމަ ރާއްޖޭގެ ދޯންޏެއްގައި އެޅި އިންޖީނުގެ ޝަރަފާ އެކު، މިއަދު ޔަންމާ ވެގެން ގޮސްފައި ވަނީ ދިވެހިންގެ އިތުބާރު ހޯދާފައިވާ މަގުބޫލް ބްރޭންޑަކަށް ކަމުގައެވެ.
އެމްޓީސީސީގެ ސީއެސްއާރުގެ ދަށުން ޔަންމާ އިންޖީނު ޓްރޭނިން އިންސްޓިޓިއުޓްތަކަށް ހަދިޔާކުރުން - ފޮޓޯ:އެމްޓީސީސީ
އެމްޓީސީސީން ބުނީ އެ ކުންފުނީގެ އަމާޒަކީ އަބަދުވެސް ކަސްޓަމަރުންނަށް ލުއިފަސޭހަ ގޮތްތައް ހޯދައިދިނުން ކަމަށެވެ. އެގޮތުން ކޮންމެ އަހަރަކުވެސް އެކިއެކި ޕްރޮޑަކްޓްތަކުން ކަސްޓަމަރުންނަށް ލުއިފަސޭހަ ޕްރޮމޯޝަންތައް ބޭއްވުމާއި ރާއްޖޭގެ އެކި ކަންކޮޅުތަކުގައި ތިބި އެ ކުންފުނީގެ ކަސްޓަމަރުންނަށް މައުލޫމާތު ފޯރުކޮށްދިނުމުގެ އިތުރުން އިންޖީނުތައް ރަނގަޅަށް ބެލެހެއްޓުމާއި ޓެކްނިކަލް ކަންކަމަށް އަހުލުވެރިކުރުމުގެ ހަރަކާތްތައް އަބަދުވެސް ރާވާ ހިންގަމުން ގެންދާ ކަމަށް އެމްޓީސީސީން ބުނެއެވެ.
