ކެމްޕޭނަށް އދ. އަތޮޅުގެ ބައެއް ރަށްރަށަށް ކުރެއްވި ދަތުރުފުޅުގައި ދިގުރަށުގައި ހުންނަވައިގެން ވާހަކަފުޅު ދައްކަވަމުން ރައީސް ސޯލިހު ވިދާޅުވީ ވޯޓަކީ ގާނޫނު އަސާސީން ކޮންމެ މީހަކާ މަތިކޮށްފައި އޮތް ޒިންމާއެއް ކަމަށެވެ. އެހެންކަމުން ކޮންމެ މީހަކު ވެސް ވޯޓުލާން ނިންމާ ނިންމުމަކީ ވަރަށް މުހިއްމު ނިންމުމެއް ކަމަށާއި ވޯޓު ގަނޑަކީ ބާކީ ކޮށްލެވޭ ވޯޓު ގަނޑަކަށް ނުހެދުން މުހިއްމު ކަމަށެވެ.
ރައީސް ސޯލިހު ވިދާޅުވީ ސެޕްޓެމްބަރު މަހުގެ ނުވަ ވަނަ ދުވަހު ވޯޓާއެކު ނިންމާ ނިންމުމަކީ ރާއްޖޭގެ ތަރައްގީއަށް ވަރަށް މުހިއްމު ނިންމުމެއް ކަމަށެވެ.
ކެމްޕޭނަށް ރާއްޖޭގެ ގިނަ ރަށްރަށަށް ވަޑައިގެންނެވިފައިވާ އިރު ލިބިވަޑައިގަންނަވާ ހިތްހަމަޖެހުމަކީ ވަކި ރަށެއް ތަފާތު ކުރުމެއް ނެތި ހިދުމަތްތައް ފުރިހަމަކޮށްދެމުން ގެންދެވޭތީ ކަމަށާއި އިދިކޮޅު ފަރާތްތަކަށް ފުރުސަތު ދީފި ނަމަ އަނެއްކާ ވެސް ރަށްރަށުގެ މެދުގައި ތަފާތު ކުރާނެ ކަމަށް ރައީސް ސޯލިހު ވިދާލުވިއެވެ. ރައީސް ސޯލިހު ވިދާޅުވީ ކުރިއަށް އޮތް ދައުރުގައި ވެސް އެމަނިކުފާނުގެ އަމާޒަކީ ވަކި ރަށެއް ތަފާތު ކުރުމެއް ނެތި ތަރައްގީ ގެނެސް ދިނުން ކަމަށެވެ.
ރައީސް ސޯލިހު ވިދާޅުވީ އިންތިހާބުގެ ވަގުތު ކުޑަތަން ވަމުން އަންނަ އިރު ވެސް އިދިކޮޅު ފަރާތްތަކުން އޮއްޓަރު ހުރި ކަންތައްތަކެއް މެނިފެސްޓޯގެ ގޮތުގައި ރައްޔިތުންނަށް ނުދައްކާ ކަމަށެވެ. އޭގެ ބަދަލުގައި ކުރާހާ ވެސް ކަމަކީ އެމަނިކުފާނު ކުރަން ވައުދުވެވަޑައިގަންނަވާ މަސައްކަތްތައް އެއަށްވުރެ ކުޑަތަންކޮޅެއް ދިގުކޮށް، ނުވަތަ ފުންކޮށް ކޮށްދޭން ވައުދުވުން ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހުވަނީ އެ ސަރަހައްދުގައި ހިމެނޭ އދ. ފަސް ރަށަށް ކުރިއަށް އޮތް ދައުރުގައި އެމަނިކުފާނު ވެވަޑައިގަންނަވާ ވައުދުތައް ހާމަ ކުރައްވާފައެވެ.
ރައީސް ސޯލިހު ދިގުރަށަށް ވެވަޑައިގަންނަވާ ވައުދުތައް:
1. މަގުތައް ތާރު އަޅައިގެން ހެދުން،
2. ފުލުހުންގެ މަރުކަޒެއް އެޅުން،
3. ސުކޫލު މަލްޓިޕާޕޯސް ހޯލު ހެދުން،
4. ފުޓުބޯޅަ ދަނޑުގައި ޓާފު އެޅުން،
5. އޮޑިދޯނި ފަހަރު އެހެލާނެ ސަރަހައްދެއް ތަރައްގީކޮށް ދިނުން.
ރައީސް ސޯލިހު ދަނގެއްޗަށް ވެވަޑައިގެންނެވި ވައުދުތައް:
1. ބިން ހިއްކާ، ރަށް ގިރުން ހައްލު ކުރުން،
2. ސުކޫލުގެ މަލްޓިޕާ؛ޕޯސް ހޯލު ހެދުން،
3. ފުޓުބޯޅަ ދަނޑެއް ހެދުން،
އޮމަދޫއަށް ރައީސް ސޯލިހު ވެވަޑައިގެންނެވި ވައުދުތައް:
1. ކުޑަދުއި ފަޅާއި، ރިއްމަސްގިރިއާއި ކަމާފުށި ފިނޮޅު އޮމަދޫގެ އިހުތިސާސްގެ ތެރޭގައި ހިމެނުން،
2. އޮޑިއެހެލާ ސަރަހައްދެއް ހެދުން،
3. ބޮޑެތި މަގުތައް ތާރު އަޅައިގެން ހެދުން،
4. ހޭންޑުބޯލު ކޯޓެއް ހެދުން.
ކުނބުރުދޫއަށް ރައީސް ސޯލިހު ވެވަޑައިގެންނެވ ި ވައުދުތައް:
1. ބިން ހިއްކުން،
2. ސިއްހީ މަރުކަޒުގެ ހިދުމަތް ފުޅާ ކުރުން،
3. 8 ކުލާސްރޫމާއި މަލްޓި ޕާޕޯސް ހޯލު ހެދުން.
ހަންޏާމީދޫއަށް ރައީސް ސޯލިހު ވެވަޑައިގެންނެވި ވައުދުތައް:
1. ގިރާ ސަރަހައްދު ހިމާޔަތް ކުރުން،
2. ފުޓުބޯލަ ދަނޑެއް ހެދުން،
3. 4 ކުލާސްރޫމާއި، މަލްޓިޕާޕޯސް ހޯލު ހެދުން،
4. ހެލްތު ޕޯސްޓު އަޕްގްރޭޑުކޮށް، އެމްބިއުލާންސެއް ރަށަށް ފޮނުވުން.
