މިރޭ މާލޭ ސިޓީގެ ގަލޮޅު ދެކުނު ކެމްޕޭން ޖަގަހަ ހުޅުއްވުމަށް ބޭއްވި ބައްދަލުވުމުގައި ގަލޮޅު ދެކުނުގައި އިމާރާތްކޮށްފައިވާ ފްލެޓްތަކާއި ބެހޭގޮތުން ވާހަކަދައްކަވަމުން ޑރ.މުއިއްޒު ވިދާޅުވީ، މިހާރު ހުރި ސިނަމާލެ އަދި މާލޭ ހިޔާ ފްލެޓްތައް ތަޅާލާ، އާ އިމާރާތްތަކެއް އެތަނުގައި އަޅުއްވާނެ ކަމަށެވެ. އަދި އެއީ މާލޭ ސިޓީ ކައުންސިލްގެ ސްޓްރީޓީޖިކް އެކްޝަން ޕްލޭންގައި ހިމަނުއްވާފައިވާ ކަމެއް ކަމަށާއި، އެހެންނަމަވެސް އެކަން ވިޔަނުދީ ހިފެހެއްޓީ މިސަރުކާރުން ކަމަށް ވެސް ޑރ.މުއިއްޒު ވިދާޅުވިއެވެ.
އެހެންނަމަވެސް، އަންނަ ރިޔާސީ އިންތިހާބުގައި އެބޭފުޅާ އިންތިހާބުވެއްޖެނަމަ، އެ ފްލެޓް ތައް ތަޅާލައި، އެތަނުގައި އައު އިމާރާތްތަކެއް އަޅުއްވާނެ ކަމަށް ވިދާޅުވެ، ޑރ.މުއިއްޒު ވައުދުވެވަޑައިގެންނެވިއެވެ. އަދި އަލަށް ކުރެވޭ އިމާރާތްތަކުގައި ބޯހިޔާވަހިކަން ފޯރުކޮށްދެވިގެން ދާނީ، މިވަގުތު އެ ފްލެޓްތަކުގައި ދިރިއުޅެމުންދާ 128 އާއިލާއަށް އެކަނި ނޫންކަމަށާއި، އެބޭފުޅާގެ ސަރުކާރެއްގައި ޕްލޭންކޮށްފައި އޮންނާނީ، ގަލޮޅު ދެކުނުގައ 1500 ހައުސިންގް ޔުނިޓް އިމާރާތްކުރާގޮތަށް ކަމަށް ވެސް ޑރ.މުއިއްޒު ވިދާޅުވިއެވެ. އަދި އިމާރާތްކުރެވިގެން ދާނީ، މިހާރަށްވުރެ ޖާގައިގެ ގޮތުން ތަނަވަސް، މިހާރަށްވުރެ ބޮޑު، ޕާކިންގްވެސް ހިމެނޭގޮތަށް ކަމަށްވެސް ޑރ.މުއިއްޒު ވިދާޅުވިއެވެ.
އަދި އަލަށް އިމާރާތްކުރެވޭ ފްލެޓްތަކުން، މިހާރު ސިނަމާލެ އަދި މާލޭހިޔާ ފްލެޓް ތަކުގައި ދިރިއުޅެމުންދާ 128 އާއިލާއަށް ފްލެޓް ދެވޭނީ ހިލޭކަމަށްވެސް (128 އާއިލާތަކުގެ ތެރެއިން ފްލެޓް ތައް އަމިއްލަކޮށްފައިވާ ފަރާތްތަކަށް) ޑރ.މުއިއްޒު ވިދާޅުވިއެވެ. އަދި ފްލެޓްތައް އަމިއްލަ ނުކުރެވި ތިބި ފަރާތްތަކުންވެސް ދައްކަން ޖެހިވަޑައިގަންނަވާނީ، އެބޭފުޅުން މިހާތަނަށް ދައްކާފައިވާ ފައިސާތައް ކެނޑުމަށްފަހު، ބާކީ ދައްކަން ޖެހޭ ފައިސާއެއްކަމަށްވެސް ޑރ.މުއިއްޒު ވިދާޅުވިއެވެ.
މީގެ އިތުރުން ޑރ.މުހައްމަދު މުއިއްޒު ވިދާޅުވީ، މިއަދު ދިވެހިންނަށް މިއޮތީ އަމިއްލަ މިނިވަންކަން އަނބުރާ ހޯދަން ޖެހިފައިކަމަށެވެ.
މިސާލު ދައްކަވަމުން، ޑރ.މުއިއްޒު ވިދާޅުވީ، ދިވެހިރާއްޖޭގެ ކަނޑުއަޑީގެ ޗާޓުތައް ކުރަހައި، އެޗާޓްތައް އިިންޑިއާއިން މިލްކުކޮށްފައިވާ ކަމަށާއި، އެޗާޓްތައް ހޯދަން ބޭނުންނަމަ، މިއަދު ދިވެހިންނަށް ޖެހެނީ، ދިވެހިންގެ ޓެކްސް ފައިސާއިން އެޗާޓްތައް ގަންނަން ކަމަށާއި، އެވެސް އިންޑިއާއިން ކަނޑައަޅާ އަގެއްގައި ކަމަށެވެ.
އިތުރަށް ވާހަކަ ދައްކަވަމުން ޑރ.މުއިއްޒު ވިދާޅުވީ، މިއަދު ފެނިގެން ދިޔަ ސިޓީގައި ބުނެފައިވާ ފަދައިން ހދ.ހަނިމާދޫ އާއި، އައްޑުއަތޮޅުން 15 ހެކްޓަރުގެ ބިން 99 އަހަރަށް ދޭން އެއްބަސްވެފައިވާ ކަމަށާއި، އޭގެ ބަދަލުގައި ލިބެނީ ކޮންމެވެސް ވަރެއްގެ ލާރިކޮޅެއް ކަމަށެވެ.
އިތުރަށް ވާހަކަ ދައްކަވަމުން ޑރ.މުއިއްޒު ވިދާޅުވީ، މިއަދު ލޯމަރާލައިފިނަމަ، ދިވެހިރާއްޖެ ދާނީ ބޭރު ބައެއްގެ އަތްމައްޗަށް ކަމަށާއި، އެއީ އިންޑިއާގެ އަތްމައްޗަށް ކަމަށްވެސް ޑރ.މުއިއްޒު ވިދާޅުވިއެވެ.
އަދި އެހެންކަމާއެކު، ގައުމުގެ ހައްގުގަ، އަދި މިނިވަންކަމުގެ ހައްގުގަ، އަންނަ ހޮނިހިރުދުވަހު ބޭއްވޭ ރިޔާސީ އިންތިހާބުގައި، އެބޭފުޅާއަށް ވޯޓް ދެއްވުމަށް އެދި ވަޑައިގަންނަވާކަމަށް ޑރ.މުއިއްޒު ވިދާޅުވިއެވެ.
