އިޔާޒު ވިދާޅުވީ ފެހި ގާނޫނު އަސާސީން ދުވަހަކު ނުދެކޭހާ ސުލްހަވެރި ދުވަސްތަކެއް ދިވެހިން ތަޖުރިބާ ކުރަމުންދާ ކަމަށާއި، ދީނީ ދައުވަތަށް ރައީސް އިބްރާހީމު މުހައްމަދު ސޯލިހު ހާ ފުރިހަމަ އެއްބާރުލުން ދެއްވި ވެރިއަކު ނެތް ކަމަށެވެ.
ދެ އަހަރަށް ވުރެ ގިނަ ދުވަހު މުޅި އިގްތިސާދު ހުއްޓާލައިގެން، ދިވެހި އެތައް ރައްޔިތުންނެއް މަރުގެ ތުންފަތްމަތިން ސަލާމަތްކޮށް، ކޮވިޑުން އަރައިގަނެފައިވަނީ ރައީސް ސޯލިހުގެ ހިކުމަތްތެރިކަމުންނާއި، އެމަނިކުފާނުގެ ހެޔޮ ހުލުގުފުޅުގެ ސަބަބުން ކަމަށެވެ.
އިޔާޒު ވިދާޅުވީ ދީނީ އިލުމުވެރިން އިސްވެ ތިބެ ހިންގާ ހަމައެކަނި ޕާޓީއަށްވީ އިރު ވެސް ރައީސް ސޯލިހަށް ތާއީދުކޮށްގެން އަދާލަތު ޕާޓީ އޮތީ ޝަރުތުތަކަކާއެކު ކަމަށެވެ. އިޔާޒު ވިދާޅުވީ ދީނީ މަސްލަހަތުތައް ހިމާޔަތް ކުރުމުގައި އަދާލަތަށްވުރެ ވަކި ކުރި ހޯދުނު ޖަމާއަތެއް ރާއްޖޭގައި ނެތް ކަމަށާއި، އިސްލާހީ މަސައްކަތުގައި އަދާލަތުގެ މެންބަރުން މުޒާހަރާކޮށްފައިވާނެ ކަމަށާއި، ޖަލުގެ ކުޑަ ގޮޅިތަކާ ހަމައަށް ވެސް ގޮސްފައިވާނެ ކަމަށެވެ.
އިޔާޒު ވިދާޅުވީ ރާއްޖޭގެ ސުލްހަވެރިކަމާއި، އަމާންކަމާއި، މިނިވަންކަމާއި، ހަމަޖެހުމައްޓަކާ ރައީސް ސޯލިހަށް ކުރިއަށް އޮތް އިންތިހާބުގައި ވޯޓު ދޭން ޖެހޭ ކަމަށެވެ.
