ދީނީ އިލުމުވެރިޔާ ޑރ.އިޔާޒު މިހެން ވިދާޅުވީ އެމްޑީޕީ ރޭ އައްޑޫސިޓީގައި ބޭއްވި ކެމްޕޭނު ޖަލުސާގައެވެ.
އިޔާޒު ވިދާޅުވީ ރައީސް ސޯލިހުގެ ފަރާތްޕުޅުން ފެނުނީ މަޑުމައިތިރިކަމާއި ކެތްތެރިކަން ކަމަށެވެ. އަދި އިދިކޮޅު ފަރާތްތަކުން ރުޅި އައިސްގެން ފުންމަ ފުންމައިގެންދާ އިރު ވެސް ރައީސް ސޯލިހު ހުންނަވަނީ ކޫލުކޮށް ކަމަށް އިޔާޒު ވިދާޅުވިއެވެ.
އިޔާޒު ވިދާޅުވީ ކުރިއަށް އޮތް ރިޔާސީ އިންތިހާބުގައި ދިވެހިންގެ ކުރިމަތީގައި އޮތީ އެތައް ގޮތަކަށް ކުރި ނަމަވެސް އެންމެ ސުވާލެއް ކަމަށެވެ. އެއީ އޯގާތެރިކަމުން އަނިޔާވެރިކަމަށް ދާނަންތޯއާއި ސުލްހަ މަސަލަސް ކަމުން ހަމަނުޖެހުމަށް ދާނަންތޯ އޮތް ސުވާލު ކަމަށް އިޔާޒު ވިދާޅުވިއެވެ.
އިޔާޒު ވިދާޅުވީ މާދުރު ނޫން މާޒީއެއްގައި ޕީޕީއެމުން ކަންތައް ކުރި ގޮތް ހަނދާނުގައި އެބަހުރި ކަމަށާއި އެކަންކަން ހަނދާން ނުނެތޭނެ ކަމަށެވެ. އެގޮތުން މަޖިލީހުގެ މެންބަރުން ފާރު މަތިން އުކި ކަމަށާއި، ބަޑިގުދަން ރަށެއްގެ ފަޅު ތެރެއިން ފެނުނު ކަމަށާއި، ސްޕްރީމް ކޯޓަށް ނުފޫޒު ފޯރުވި ކަމަށް އިޔާޒު ވިދާޅުވިއެވެ.
އިޔާޒު ވިދާޅުވީ އިދިކޮޅު ފަރާތްތަކުގެ ގޮތުގައި މިހާރު ތިބީ އެއަމަލުތައް ހިންގި މީހުން ކަމަށާއި ރާއްޖޭގެ ވެރިކަން ދެން ލިބުނަސް އެފަރާތްތަކުން ކަން ކުރާނީ ހަމަ އެހެން ކަމަށެވެ.
