ރޭ ދަ ޑިމޮކްރެޓްސްއިން ސަލްޓަން ޕާކުގައި ބޭއްވި މާލޭ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ ރާއްޖެއަށް މިހާރު އެންމެ މުހިންމު ކަމަކީ ނަގާފައިވާ ދަރަނިތައް ދެއްކުން ކަމަށެވެ. ނަޝީދު ވިދާޅުވެފައިވަނީ 2026 ވަނަ އަހަރަށްވާއިރު ދަރަނީގެ ގޮތުގައި އަނބުރާ ދައްކަން ޖެހޭ މިންވަރު އެއް ބިލިއަން ޑޮލަރަށްވުރެ އިތުރުވާނެ ކަމަށެވެ.
އެ ދަރަނި އަދާކުރައްވާނީ ރީފައިނޭންސް ކޮށްގެން ކަމަށް ރައީސް އިބްރާހިމް މުހައްމަދު ސޯލިހް ވިދާޅުވާ ކަން ފާހަގަކުރައްވާ ނަޝީދު ވިދާޅުވީ އެއީ ރައީސް ސޯލިހު ކުރިންވެސް ކުރެއްވި ކަމެއް ކަމަށެވެ. ކުރީގެ ރައީސް އަބްދުﷲ ޔާމީންގެ ސަނީސައިޓް ބޮންޑު އަލުން އަނބުރާ ދެއްކުމުގެ ބަދަލުގައި އެ ބޮންޑަށްވާ ފައިސާ ދެއްކުމަށްޓަކައި ރައީސް ސޯލިހް ދަރަނި ނެންގެވި ކަމަށް ވިދާޅުވާ ވިދާޅުވުން ރޭވެސް ނަޝީދު ތަކުރާރު ކުރެއްވިއެވެ.
ދަރަނި ދެއްކުމަށް އަނެއްކާވެސް ދަރަންޏެއް ނެގުމަކީ ދިވެހިންނަށް ގަބޫލުކުރެވޭ ގޮތެއް ނޫން ކަމަށް އެމަނިކުފާނަށް ކަށަވަރު ކުރެވޭ ކަމަށާއި އެއީ އިންތިހާއަށް ގެއްލުން ބޮޑުވާނެ ގޮތެއް ކަމަށް ނަޝީދު ވިދާޅުވިއެވެ.
ނަޝީދު ވިދާޅުވެފައިވަނީ ރާއްޖެ އޮތީ ޗައިނާ އާއި އިންޑިއާއަށް އިންތިހާ ދަރަޖައަށް ދަރާފައި ކަމަށެވެ. އެ ދަރަނި ނުބެލެހެއްޓިއްޖެ ނަމަ މުސްތަގުބަލް ވަރަށް އަނދިރިވާނެ ކަމަށް އެމަނިކުފާނު ވިދާޅުވިއެވެ. ނަޝީދު ވިދާޅުވި ގޮތުގައި ރާއްޖެއަށް ތަނަވަސްކަމެއް އެކަމުން ނުލިބޭނެ ކަމަށާއި ދިމާވާ ދަތިތައް އިންތިހާއަށް ގޯސްވާނެ ކަމުގައެވެ.
