އެމްޑީޕީ އާއި ގުޅިފައިވާ ޕާޓީތަކުން ބުނަމުން އައި ގޮތަށް އިންތިހާބު އެއްބުރުން ކާމިޔާބު ނުކުރެވުނުއިރު، އިންތިހާބުގެ ފުރަތަމަ ބުރުން ކުރި ހޯއްދަވާފައިވަނީ ވާދަވެެރި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒެވެ. ވަގުތީ ނަތީޖާއިން ދައްކާގޮތުން މުއިއްޒު ކުރި ހޯއްދަވާފައިވަނީ 46 އިންސައްތަ ވޯޓާ އެކުގައެވެ. އެމްޑީޕީ އާއި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު ސޯލިހަށް ލިބިވަޑައިގެންނެވީ 39 އިންސައްތަ ވޯޓެވެ.
އިންތިހާބާ ގުޅިގެން އަލީ ޒާހިރު އެކްސްގައި ވިދާޅުވީ އިންތިހާބު އެއްބުރުން އިންތިހާބު ކާމިޔާބު ނުކުރެވުނު ނަމަވެސް އެކަން އަދި ނިމުނީކީ ނޫން ކަމަށާއި ދެވަނަ ބުރަށް ދާނީ މާ ވަރުގަދަކޮށް ކަމަށެވެ.
އިންތިހާބުގެ ފުރަތަމަ ބުރުގައި ކުރިމަތިވި ނާކާމިޔާބީ އާއެކު ދެވަނަ ބުރު ކާމިޔާބު ކުރުމަށް އެމްޑީޕީ އާއި ގުޅިފައިވާ ޕާޓީތަކުން މިހާރު އަންނަނީ ތައްޔާރުވަމުންނެވެ.
އިންތިހާބަށްފަހު ރައީސް ސޯލިހު ވިދާޅުވެފައިވަނީ އެމްޑީޕީއަށް ކުރިން ވިސްނިފައި ނެތް ބައެއް ކަންކަން އެބަހުރި ކަމަށާއި އިންތިހާބުން ލިބިވަޑައިގެންނެވީ އުންމީދުކުރެއްވި ފަދަ ނަތީޖާއެއް ނޫން ކަމަށެވެ. އެހެންކަމުން ދެން ކުރިއަށް ދެވޭނީ ކޮންމެވެސް ބަޔަކާ ގުޅިގެން ކަމަށް ރައީސް ވިދާޅުވިއެވެ.
ރިޔާސީ އިންތިހާބުގެ ދެވަނަ ބުރު ބޭއްވުމަށް ހަމަޖެހިފައިވަނީ މި މަހުގެ 30 ވަނަ ދުވަހުއެވެ.
