ރާއްޖެޓީވީގެ "ފަށާއިރު" ޕްރޮގްރާމަށް ދެއްވި ފޯނު އިންޓަވިއުއެއްގައި ރައީސް ސޯލިހު ވިދާޅުވެފައިވަނީ ބައެއް ޕާޓީތަކާ އެކު އިއްޔެ ވާހަކަ ދެކެވިފައިވާ ކަމަށާއި އެކުގައި ކުރިއަށް ދިއުމަށް މަސައްކަތް ކުރަމުން އަންނަ ކަމަށެވެ. އެހެންނަމަވެސް އެކަން ރަސްމީކޮށް އިއުލާނު ކުރެވޭ ހިސާބަކަށް އަދި ނުދާ ކަމަށް ރައީސް ވިދާޅުވިއެވެ.
ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ ވާދަވެެރި ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒެވެ. މުއިއްޒު 100،723 ވޯޓު ހޯއްދެވިއިރު، އެމްޑީޕީ އާއި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް ރައީސް ސޯލިހަށް ލިބިވަޑައިގަތީ 85،126 ވޯޓެވެ.
ރައީސް ނަޝީދު ފަހަތުގައި ހުންނަވާ އުފެއްދެވި ދަ ޑިމޮކްރެޓްސްއިން ރިޔާސީ ކެންޑިޑޭޓެއްގެ ގޮތުގައި ވާދަކުރެއްވި އިލްޔާސް ލަބީބު ވަނީ 15،633 ވޯޓާ އެކު އިންތިހާބުގައި ތިންވަނަ ހޯއްދަވާފައެވެ.
ރައީސް ވިދާޅުވި ގޮތުގައި ދެތިން ޕާޓީއަކުން އެމަނިކުފާނާ ގުޅޭނެ ކަމަށް އުންމީދު ކުރައްވާ ކަމުގައެވެ.
ރިޔާސީ އިންތިހާބުގެ ފުރަތަމަ ބުރުގައި ހަތަރު ވަނައަށް އެންމެ ގިނަ ވޯޓު ހޯއްދެވީ އަމިއްލަ ގޮތުން ވާދަކުރެއްވި އުމަރު ނަސީރެވެ. ފަސްވަނައަށް އެންމެ ގިނަ ވޯޓު ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމަށް ލިބިލެއްވިއިރު، އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމަށާއި އަމިއްލަގޮތުން ވާދަކުރެއްވި ފާރިސް މައުމޫނާއި ހަސަން ޒަމީލަށްވެސް މަދު އަދަދެއްގެ ވޯޓު ލިބިވަޑައިގަތެވެ.
