ކިންގްސްއަށް ދިމާވެފައިވާ މައްސަލަ އާ ގުޅޭގޮތުން އަލްހާން މިއަދު ދެއްވި ސްޓޭޓްމަންޓެއްގައި ވިދާޅުވީ އޭނާގެ ކުންފުނި، ކިންގްސް ކެޕިޓަލް ހޯލްޑިންގްސްގެ ބޯޑުން، އޮންލައިން ޓްރޭޑް ކުރުމަށް ނިންމާ، އިންޓަނޭޝަނަލް ބްރޯކަރަކާ އެކީ އެފިލިއޭޓް ޕާޓްނަޝިޕެއް ހެދިކަމަށެވެ. ކުންފުނިން ރޭވި އިންތިޒާމެއްގެ ތެރެެއިން އޮންލައިން ޓްރޭޑިންގެ އެކައުންޓުތަކެއް ހޯދާ، އާންމު ފަރުދުންގެ އަތުންވެސް ޓްރޭޑްކުރަން ކެޕިޓަލް ހޯދަން ނިންމާ، ބައިވެރިވާން ބޭނުން ފަރާތްތަކަށް ވަކި މުއްދަތަކުން ފައިދާ އަނބުރާ ލިބޭ ގޮތަށް އިންވެސްޓްމަންޓް ޕެކޭޖް ނަގައިގެން ވިޔަފާރީގައި ބައިވެރިވެވޭނެ އިންތިޒާމް ހަމަޖެއްސި ކަމަށް އަލްހާން ވިދާޅުވިއެވެ.
އަލްހާން ވިދާޅުވެފައިވަނީ އެކަން ބަރާބަރަށް ކުރަމުން އަންނަތާ ތިން މަސްވީ ތަނާ، އެއްވެސް ފަރާތެއްގެ ޝަކުވާއެއް ނެތީސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަންގައިގެން ބޭންކް އޮފް މޯލްޑިވްސް (ބީއެމްއެލް) ގައި އޮންނަ ކިންގްސްގެ އެކައުންޓް ފްރީޒްކޮށް ވިޔަފާރި ގާނޫނާ ހިލާފަށް ހުއްޓުވާލުމުގެ ސަބަބުން، ކުންފުންޏަށާއި ޓްރޭޑް ކުރުމަށް ދިމާވި ދަތިތަކާ ހުރެ، އެތައް ބައިވަރު ފައިސާ ގެއްލުނު ކަމަށެވެ. އެކަމުގެ ސަބަބުން އިންވެސްޓްކުރި ފަރާތްތަކުގެ ތެރެއިން ބައެއް ފަރާތްތަކަށް އެ ދުވަހުން ފެށިގެން އެއްބަސްވި ގޮތަށް ފައިސާ ދެވިފައި ނުވީ ނަމަވެސް، އެ ވިޔަފާރިއަކީ މަކަރާ ހީލަތާ މަނީލޯންޑަރިންގެ ކުށުގެ އަމަލު ހިމެނޭ ކަމެއް ނޫން ކަމަށް އޭނާ ވިދާޅުވިއެވެ.
އަލްހާން ވިދާޅުވި ގޮތުގައި އެމްއެމްއޭއިން ތުހުމަތުކުރި މަނީލޯންޑަރިންގެ މައްސަލައިގެ ތަހުގީގު ދިގުލާ ނުނިމި އޮތުމަކީ ކުންފުންޏަށް ވިޔަފާރި ކުރިއަށް ގެންދެވެން ނެތް އެންމެ ބޮޑު ސަބަބު ކަމުގައެވެ.
ކިންގްސް ކުންފުނީގެ އެކައުންޓް ބަންދުކޮށް ވިޔަފާރި ހުއްޓުވި މައްސަލާގައި ބީއެމްއެލުން އެކަން ކޮށްފައިވަނީ ގާނޫނާ ހިލާފަށް ކަމަށާއި ލިބުނުގެ ގެއްލުމުގެ ބަދަލު ދޭން ޖެހޭނެ ކަމަށް ޝަރީއަތުން ކަނޑައަޅާފައިވާއިރު އެ މައްސަލަ އެ ބޭންކުން ހައިކޯޓުގައި އިސްތިއުނާފުކޮށްފައިވާ ކަމަށް އަލްހާން ވިދާޅުވިއެވެ.
އަލްހާން ވިދާޅުވީ ކިންގްސް ކުންފުނީގެ ވިޔަފާރި ހުއްޓުވުމުގެ ކުރިން ބަރާބަރަށް ފައިސާ ދެމުން އައިކަން އިންވެސްޓަރުންނަށް ރަނގަޅަށް އެނގޭނެ ކަމަށާއި ފައިދާ އާ އެކީ ލިބުނު މީހުން މަދު ނުވާނެ ކަމަށެވެ.
އަލްހާން ވިދާޅުވެފައިވަނީ އޭނާގެ ވިޔަފާރި އާ ގުޅިގެން ދެ ފަރާތުގެ މަންފާއަށްޓަކައި ކުރި މަސައްކަތް ހުއްޓި، ބައެއް ފަރާތްތަކަށް ދަތިތަކާ ކުރިމަތިވެފައިވާތީ އެކަމަށް މައާފަށް އެދިވަޑައިގަންނަވާ ކަމަށެވެ. މިކަން ސިޔާސީ ކަމަކަށް ނަހަދާ، އޭނާއަށް ދިމާވި ހާލަތު ގަބޫލުކޮށް، ވަގުތުދެއްވުމަށް އަލްހާން ވަނީ އެދިވަޑައިގެންފައެވެ.
އަލްހާން ވިދާޅުވި ގޮތުގައި ކިންގްސްއަށް ދިމާވެފައިވާ މައްސަލަ ހައްލުކޮށް، ކުންފުނީގެ ދަރަނި އަދާކޮށް، ރާއްޖޭގެ އިގުތިސޯދާއި ރައްުޔިތުންނަށް މިކަމުގެ މަންފާ ހޯދައިދޭނެކަމުގެ ޔަގީންކަން ދެއްވާ ކަމުގައެވެ.
