ރިޔާސީ އިންތިހާބުގެ ފުރަތަމަ ބުރުގެ ރަސްމީ ނަތީޖާ އާންމުކޮށްފައިވާއިރު، 225،486 ވޯޓުގެ ތެރެއިން 4،835 ވޯޓަކީ ބާތިލު ވޯޓު ކަމަށް އީސީން ވަނީ ކަނޑައަޅާފައެވެ. ގިނަ ވޯޓުތައް ބާތިލުވެފައިވަނީ ފާހަގަ މަތިން ދެވަނަ ފަހަރަށް ފާހަގަ ޖަހާފައި ހުރުމުންނާއި ފާހަގަ ރަނގަޅަށް ނުގުޅި ހުރުމުންނެވެ. އީސީގެ އުސޫލުގައިވާ ގޮތުން އެއް ފާހަގައަށްވުރެ ގިނަ ފާހަގަ ވޯޓު ކަރުދާހުގައި ލާފައިވާ ނަމަ ވޯޓު ބާތިލުވެއެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕެއިން ހަރަކާތްތައް ފެށުމަށް ރޭ އެމްޑީޕީ ޖަގަހައިގައި ބޭއްވި ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ ސުޕްރީމް ކޯޓަށް ގޮސްގެން އިންތިހާބު ބާތިލު ކުރާ މިންވަރަށް މި އިންތިހާބުގައި ބާތިލު ވޯޓު އެބަހުރި ކަމަށެވެ. އެހެންނަމަވެސް އެކަން އެގޮތަށް ނުކުރާނެ ކަމަށާއި މަސައްކަތްކުރާނީ އިންތިހާބުގެ ދެވަނަ ބުރުގައި ކާމިޔާބު ހޯދުމަށް ކަމަށް މާރިޔާ ވިދާޅުވިއެވެ.
އިންތިހާބުގެ އިންތިޒާމްތައް އީސީން ހަމަޖައްސާފައިވަނީ ދޯދިޔާކޮށްކަން ފާހަގަކުރައްވާ މާރިޔާ ވިދާޅުވި ގޮތުގައި ފުރޮޅުލީ ގޮނޑީގައި ވޯޓުލާން ވަދެވޭނެ ގޮތެއް ނެތް ކަމުގައެވެ. އަދި ދުވަސްވީ މީހުން އިށީނދެ ތިބޭނެ ގޮތެއް ނެތް ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ މީގެ ކުރިން 65 އަހަރުން މަތީގެ މީހުންނަށް އަވަހަށް ވޯޓުލެވޭ ގޮތް ހަދައިދޭ ކަމަށެވެ. އެތައް އިރަކު ކިއުގައި މަޑުކޮށް ވޯޓު ނުލެވި ގެއަށް ދިޔަ އެތައް ފަރާތެއް އެބަތިބި ކަމަށް މާރިޔާ ވިދާޅުވިއެވެ.
ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރިޔާސީ ކެންޑިޑޭޓު ޑރ. މުހައްމަދު މުއިއްޒެވެ. މުއިއްޒު 101،635 ވޯޓު ހޯއްދެވިއިރު، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އާއި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް ރައީސް ސޯލިހަށް ލިބިވަޑައިގަތީ 86،161 ވޯޓެވެ.
