މިދިޔަ ހޮނިހިރު ދުވަހު ބޭއްވި އިންތިހާބުގެ ފުރަތަމަ ބުރުގެ ކެމްޕެއިނުގައި ރައީސް ސޯލިހާ އެކު ފަޒްނާ އަމަލީ ގޮތުން ބައިވެރިވެވަޑައި ނުގެންނެވި ނަމަވެސް އެ ބުރުގައި ލިބިވަޑައިގެންނެވި ނާކާމިޔާބީ އާއެކު ފަޒްނާ ވަނީ ދެވަނަ ބުރަށް ކެމްޕެއިން ކުރެއްވުމަށް ނިކުންނަވާފައެވެ. އެގޮތުން އިއްޔެ މާފަންނު ހުޅަނގުގެ ބައެއް ގެތަކަށް ދޮރުން ދޮރަށް ހިންގެވުމަށްފަހު، ތަޖުރިބާ ކުރެއްވި ބައެއް ކަންކަން ވަނީ ފޭސްބުކްގައި ހިއްސާ ކުރައްވާފައެވެ.
އެ ތަޖުރިބާތައް ހިއްސާ ކުރައްވަމުން ފަޒްނާ ވިދާޅުވީ އިންތިހާބުގެ ފުރަތަމަ ބުރުގައި އެމްޑީޕީއަށް ކަންތައް ވީ ގޮތާ މެދު ދެރަވިޔަސް އެއްވެސް މީހަކު އުންމީދު ކަނޑާނުލާ ކަމަށެވެ.
އެ ކަމަނާ ވަޑައިގެންނެވި ގެތަކުން ފެނިވަޑައިގަތީ އެކި ރަށްރަށާއި ރާއްޖޭން ބޭރަށް ގުޅައިގެން މި މަހުުގެ 30 ވަނަ ދުވަހު އޮންނަ އިންތިހާބުގެ ދެވަނަ ބުރަށް ރީ-ރަޖިސްޓަރީ ކުރުމަށް ތައްޔާރުވަމުން އަންނަ މަންޒަރު ކަމަށް ފަޒްނާ ވިދާޅުވިއެވެ. ފަޒްނާ ވިދާޅުވެފައިވަނީ ފަތުރަމުންދާ ހީލަތްތެރި ދޮގު ވާހަކަތަކުގެ ހަގީގަތް މީހުންނަށް އޮޅުންފިލުވައި ދެމުންގެންދާ ތަން ގޭގެއަށް ހިންގެވުމުން ފެނިވަޑައިގެންނެވި ކަމަށެވެ.
ގެތަކަށް ކުރެއްވި ޒިޔާރަތުގައި ފުރަތަމަ ބުރުގައި ވޯޓު ލާން ނުދާ މީހުންނާ ދިމާވި ކަން ފާހަގަކުރައްވާ ފަޒުނާ ވިދާޅުވީ އޭގެތެރެއިން ބައެއް މީހުންނަކީ ދެވަނަ ބުރެއް އޮންނާނެތީވެ ވޯޓު ލާން ނުދިޔަ މީހުން ކަމަށް ބުނާ ކަމަށެވެ. އަދި "އޮފާ" އަކަށް އައިޑީކާޑު ދޫކޮށްލައިގެން ހުރި މީހަކާވެސް ދިމާވި ކަމަށް ފަޒުނާ ވިދާޅުވިއެވެ.
ދޮރުން ދޮރަށް ހިންގެވުމަށްފަހު، ގެކޮޅަށް ވަޑައިގެން ފޯނު ބެއްލެވިއިރު، ލިބިވަޑައިގެންނެވި މެސެޖެއް ހިއްސާ ކުރައްވާ ފަޒްނާ ވިދާޅުވެފައިވަނީ އެ މެސެޖުގައި މި ސަރުކާރު ދަމަހައްޓަން ބޭނުންވާ ސަބަބަކަށް ނަފުސާނީ ސިއްހަތު އަދި އިޖުތިމާއީ ސިޔާސަތުތައް ފާހަގަކޮށްފައިވުމަކީ އެކަމާ އުފާކުރައްވާ ކަމެއް ކަމަށެވެ.
އިންތިހާބުގެ ދެވަނަ ބުރުގެ ކެމްޕެއިން ހަރަކާތްތައް ފެށުމަށް ދަނޑިކޮށި ޖަގަހައިގައި އަންގާރަ ދުވަހުގެ ރޭ ބޭއްވި ބައްދަލުވުމަށްވެސް ފަޒުނާ ވަނީ ވަޑައިގެންފައެވެ.
އިންތިހާބުގެ ފުރަތަމަ ބުރުގައި އެމްޑީޕީ އާއި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް ރައީސް ސޯލިހަށް ލިބިވަޑައިގެންނެވީ 86،161 ވޯޓެވެ. އެ މަނިކުފާނާ އެންމެ ވާދަވެރި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވަނީ 101،635 ވޯޓު ފުރަތަމަ ބުރުގައި ހޯއްދަވާފައެވެ.
