އެޗްއާރުސީއެމުން މިއަދު ނެރުނު ނޫސް ބަޔާނުގައި ބުނީ ކުރިން އެންގުމަކާ ނުލައި، ހުއްދަ ހޯދުމެއް ނެތި އެއްވުން މަނާކޮށްފައި ވަނީ ގާނޫނު އަސާސީ އާއި ރާއްޖޭން ސޮއިކޮށް ތަސްދީގުކޮށްފައިވާ މަދަނީ އަދި ސިޔާސީ ހައްގުތަކާ ބެހޭ ބައިނަލްއަގުވާމީ މުއާހަދާ އާ ހިލާފަށް ކަމަށެވެ.
ކުރިން ހުއްދަ ހޯދުމަކާ ނުލައި އެއްވުން މަނާ ކުރާ މާއްދާ އުވާލުމުގެ ބިލު 2019 ވަނަ އަހަރު ރައްޔިތުންގެ މަޖިލީހަށް ހުށަހަޅުއްވާފައި ވަނީ ކާށިދޫ ދާއިރާގެ މެންބަރު އަބްދުﷲ ޖާބިރެވެ.
އެޗްއާރްސީއެމުން ބުނި ގޮތުގައި އެ އިސްލާހު އުވާލުމަށް ހުށަހަޅާފައިވާ ބިލު އަވަސް ކުރުމަށް ރައްޔިތުންގެ މަޖިލީހުގައި އެ ކޮމިޝަނުން އެދިފައިވާނެ ކަމުގައެވެ.
ކުރިން ހުއްދަ ހޯދުމަކާ ނުލައި މާލޭގެ ކާނިވާ ނޫން ސަރަހައްދަކަށް އެއްވުން މަނާ ކޮށްފައިވަނީ 2016 ވަނަ އަހަރުގެ އޮގަސްޓް 17 ވަނަ ދުވަހު، އޭރުގެ ރައީސް ޔާމީންގެ ވެރިކަމުގައެވެ.