އިލެކްޝަންސް ކޮމިޝަނުގެ ނައިބު ރައީސް، އިސްމާއީލް ހަބީބް ވިދާޅުވީ، ރިޔާސީ އިންތިހާބުގެ ދެވަނަބުރުގެ ރީ-ރެޖިސްޓްރޭޝަން، ފުރަތަމަ ދުވަހު 9،206 މީހުން ރީ-ރަޖިސްޓަރީ ކުރަން ފޯމު ހުށަހެޅިއިރު، ދެވަނަ ދުވަހު 16،287 ރީ-ރަޖިސްޓަރީ ކުރަން ފޯމު ހުށަހަޅާފައިވާ ކަމަށެވެ. އެއީ ޖުމްލަ 25،493 ފޯމުއެވެ.
އޮންލައިންކޮށް ފުރަތަމަ ދުވަހު 7،267 ފޯމު، ދެވަނަ ދުވަހު 11،082 ފޯމާއިއެކީ، ޖުމްލަ 18،349 ފަރާތްތަކުން އޮންލައިންކޮށް ރީރަޖިސްޓްރޭޝަނަށް ހުށަހަޅާފައިވާ ކަމަށް ހަބީބް ވިދާޅުވިއެވެ.
ހަބީބް ވިދާޅުވީ، ފޯމު ހުށަހެޅި ފަރާތްތަކުގެ ތެރެއިން މިހާތަނަށް، ދެވަނަބުރުގައި، 10،271 މީހުން ރީ-ރަޖިސްޓަރީ ކޮށްދެވިފައިވާ ކަމަށެވެ.
ހަބީބު ވިދާޅުވީ ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވޯޓުލުމަށް ރީ-ރެޖިސްޓަވުމަށް އިތުރު ފުރުސަތެއް ހުޅުވާނުލެވޭނެ ކަމަށެވެ. ރީ-ރެޖިސްޓަކުރުމުގެ މުއްދަތު ހަމަވާނީ މިއަދު 4:00 ގަ އެވެ. އަދި މިއަދުގެ ހަވީރު 4:00 ގެ ކުރިން، ރީ-ރަޖިސްޓަރީ ކުރަން ހުށަނާޅައިފި ނަމަ ދެ ވަނަ ބުރުގައި ވޯޓު ލުމުގެ ފުރުސަތު ލިބުން ނާދިރު ކަމަށް ވިދާޅުވި އެވެ.
"ވަގުތެއް ވެސް އިތުރުކޮށް ނުދެވޭނެ،" އޭނާ ވިދާޅުވި އެވެ.
އިންތިހާބުގެ ދެވަނަ ބުރު ބޭއްވުމަށް ހަމަޖެހިފައިވަނީ މި މަހުގެ 30 ވަނަ ދުވަހު އެވެ. ދެވަނަ ބުރުގައި ވާދަކުރައްވާނީ ފުރަތަމަ ބުރުގައި 101،494 ވޯޓު ލިބިވަޑައިގެންނެވި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އާއި 86،166 ވޯޓު ލިބިވަޑައިގެންނެވި ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު އެވެ.
