މިކަން ހާމަކޮށް ޑީއެންއާރު އިން ނެރުނު ނޫސް ބަޔާނެއްގައި ބުނެފައިވަނީ، ރިޔާސީ އިންތިހާބުގެ ދެވަނަ ބުރުގައި ވޯޓްލުމަށް ތައްޔާރުވުމުގެ ގޮތުން، މިހާރު މުއްދަތު ހަމަވެފައިވާ އައިޑީ ކާޑް ތަކާއި، އަދި ސެޕްޓެމްބަރު މަހުގެ 30 ވަނަ ދުވަހުގެ ނިޔަލަށް މުއްދަތު ހަމަވާ އައިޑީ ކާޑް ތައް، އައު ކުރުމަށް އެދި، މިމަހުގެ 21 ވާ ބުރާސްފަތި ދުވަހުގެ މެންދުރު 14:00 ހުށަހެޅުމަށް އިލްތިމާސް ކުރާ ކަމަށެވެ.
މީގެ އިތުރުން، ސެޕްޓެމްބަރު މަހުގެ 30 ވަނަދުވަހަށް 18 އަހަރު ފުރޭ ފަރާތްތަކުންވެސް އައިޑީ ކާޑް އަލުން ހެއްދުމަށް މިމަހުގެ 21 ވަނަދުވަހުގެ ކުރިން ހުށަހެޅުމަށް ދަންނަވާކަމަށްވެސް ޑީއެންއާރުގެ ނޫސް ބަޔާނުގައި ބުނެފައިވެއެވެ.
ރިޔާސީ އިންތިހާބުގައި ވޯޓުލުމަށް، ގެންދަންޖެހޭ ކާކު އަންގައިދޭ ލިޔުމުގެ ގޮތުގައި ހުށަހެޅޭނީ، މުއްދަތު ހަމަނުވާ އައިޑީ ކާޑާއި، ޕާސްޕޯޓްގެ އިތުރުން ލައިސެންސް ކާޑު ކަމުގައި އިލެކްޝަން ކޮމިޝަނުން ވަނީ ކަނޑައަޅާފައެވެ. ސަރުކާރުގެ އީފާސް އެކައުންޓު މެދުވެރިކޮށް ޑިޖިޓަލް އައިޑީ ކާޑްގެ ހިދުމަތް ލިބެމުން އަންނަ ނަމަވެސް، ރިޔާސީ އިންތިހާބުގައި ޑިޖިޓަލް އައިޑީ ކާޑް ބޭނުންނުކުރެވޭނެކަމަށް އިލެކްޝަން ކޮމިޝަނުން ވަނީ ބުނެފައިއެވެ.
ރިޔާސީ އިންތިހާބުގެ ދެވަނަބުރުގައި، ސެޕްޓެމްބަރު މަހުގެ 30 ވަނަ ދުވަހާއި ހަމައަށް އުމުރުން 18 އަހަރުފުރޭ 408 ފަރާތަކާއެކު، ޖުމްލަ 282803 ފަރާތަކަށް ވޯޓް ލުމުގެ ހައްގު ލިބިގެންވާކަމަށް އިލެކްޝަން ކޮމިޝަނުން ވަނީ ބުނެފައިއެވެ.
