އެމްޓީޑީގެ ސޯޝަލްމީޑިއާގެ ހެންޑްލް އިން ވަނީ މިއަދު ރައީސް ސޯލިހާއެކު ނަންގަވާފައިވާ ފޮޓޯ އެއް ހިއްސާކޮށް، އެޕާޓީގެ ކައުންސިލްގެ ފަރާތުން ރައީސް ސޯލިހާއި ބައްދަލުކޮށްފައިވާ ކަން ހާމަކޮށްފައެވެ.
އެ މެސެޖުގައިވާގޮތުން، މި ބައްދަލުވުމުގައި ރާއްޖޭގެ މިވަގުތުގެ ސިޔާސީ މަސްރަހާއި، އަދި ރާއްޖެއަށް ދިމާވަމުންދާ އެކިއެކި މައްސަލަތަކާއި ބެހޭގޮތުން "ފައިދާކުރުވަނިވި" މަޝްވަރާތަކެއް ކުރެވިފައިވެއެވެ.
އެމްޓީޑީއިން ރައީސް ސޯލިހާއި ބައްދަލުކޮށް މަޝްވަރާކޮށްފައި ވިޔަސް، ރިޔާސީ އިންތިހާބުގެ ކެމްޕޭނާއި ގުޅޭގޮތުން ނުވަތަ، އިންތިހާބުގައި ރައީސް ސޯލިހަށް ތާއީދުކުރައްވާކަން މިހާތަނަށް ހާމަކޮށްފައެއް ނުވެއެވެ.
ކުރީގެ ނާއިބު ރައީސް އަހުމަދު އަދީބަށް ޖަލުހުކުމެއް އައިސްފައިވަނީ، އެމްއެމްޕީއާރުސީގެ ހިޔާނަތުގެ މައްސަލައެއްގައި އެވެ. މިމައްސަލައިގައި އަހުމަދު އަދީބަށް 20 އަހަރުގެ ޖަލުހުކުމެއް އަޔަސް، ހުކުން ތަންފީޒު ކުރައްވަމުން ގެންދަވަނީ ގޭ ބަންދުގައި ކަން ފާހަގަ ކޮށްލެވެއެވެ.
އެމްޓީޑީން ރައީސާ ބައްދަލު ކޮށްފައިވާއިރު، އެޕާޓީގެ ލީޑަރު އަދީބު ހުންނެވީ ބޭސް ފަރުވާއަށް ސިންގަޕޫރުގަ އެވެ. ޖަލު ހުކުމެއް ތަންފީޒު ކުރައްވަމުން ގެންދަވާ އަދީބު ރާއްޖޭން ބޭރަށް ފުރާވަޑައިގެންފައި ވަނީ ޖުލައި މަހުގެ 11 ވަނަ ދުވަހު އެވެ. އޭގެ ފަހުން ދެ ފަހަރު މަތީން މުއްދަތު އިތުރު ކޮށްދީފައިވާއިރު، އަނެއްކާވެސް މުއްދަތު އިތުރު ކޮށްދޭން އަދީބުގެ ފަރާތުން ވަނީ އެދިފަ އެވެ.
