މިއަދު ޕީޕީއެމް ކޯލިޝަނުން ބޭއްވި ނޫސްވެރިންގެ ބައްދަލުވުމުގައި "ސީއެންއެމް" އިން ކުރި ސުވާލަކަށް ޖަވާބުދެއްވަމުން ޑރ. މުއިއްޒުގެ ތަރުޖަމާން މުހައްމަދު ތޮލާލް ވިދާޅުވީ އިއްޔެ ފަޒްނާގެ ކެމްޕެއިނަށް ހުރަސް އެޅުން އެއީ ޕީޕީއެމް އިން ކުރި ކަމެއް ނޫން ކަމުގަ އެވެ.
ތޮލާލް ވިދާޅުވީ އެފަދަ ކަމެއް ޕީޕީއެމް އަދި އެ ޕާޓީއަށް ނިސްބަތްވާ ބަޔަކުވެސް ނުކުރައްވާނެ ކަމަށާއި، އެއީ އެއްވެ ތިބި ފަރާތްތަކުގެ ތެރެއިން "ކޮންމެވެސް ބަޔަކު" ކުރި ކަމެއް ކަމަށެވެ. އަދި ވިދާޅުވީ މިފަދަ ކަންކަމަށް ޕީޕީއެމް އަދި އެ ކޯލިޝަނުން ވެސް ސަޕޯޓު ނުކުރައްވާ ކަމަށެވެ.
ހުޅުމާލޭ ދެވަނަ ފިޔަވަހީގައި ރައީސް އިބްރާހިމް މުހައްމަދު ސޯލިހަށް ތާއީދު ހޯއްދެވުމުގެ ގޮތުން އިއްޔެ ބޭއްވި ހަރަކާތުގައި އެތަނުން ބަޔަކު ވަނީ މެޑަމް ފަޒްނާ އަށް ނިސްބަތްކޮށް ހުތުރު ބަސް ރައްދުކޮށް އަޑު އުފުލާފަ އެވެ.
އިއްޔެ ހިނގި މި ކަންތައްތަކާއި ގުޅިގެން ފަޒްނާ ވިދާޅވެފައިވަނީ އެކަމަނާއާއި ދެކޮޅަށް އަޑު އުފުލާ ފުރައްސާރަކުރި ކުރުމުން ލިބިވަޑައިގެންނެވީ ހިތްވަރު ކަމަށެވެ.
ފަޒްނާއަށް ފުރައްސާރަ ކުރުމާއި ގުޅިގެން މީހަކު ހައްޔަރު ކުރާ މަންޒަރު ސޯޝަލް މީޑިއާގައި އާއްމުވެފައިވެއެވެ. އެހެންނަމަވެސް އެއީ ކާކު ކަމެއް ސީދާ އަދި މިހާތަނަށް ފުލުހުން ވެސް ހާމަކޮށްފައެއް ނުވެއެވެ. ސޯޝަލް މީޑިއާގައި ގިނަ ބަޔަކު އަންނަނީ މެޑަމް ފަޒްނާއާ ދިމާކުރުން ކުށްވެރިކޮށް އެކަމަށް ފާޑު ކިޔަމުންނެވެ.
ފަޒްނާ އަހުމަދު ހިޔާ ފްލެޓް ސަރަހައްދަށް ވަޑައިގަތުމުން އެކަމަނާއަށް ހުރަސް އަޅަން ބަޔަކު ކުރި މަސައްކަތް، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ވަނީ މިއަދު ކުށްވެރިކޮށްފަ އެވެ.
