އިދިކޮޅު ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ސްޕޯކްޕާސަން (އެސްޖީ) މުހައްމަދު ތޮލާލް މިއަދު ވިދާޅުވީ މަޝްވަރާތައް އަދިވެސް ދަނީ ކުރިއަށް ކަމަށާއި ކުރިއަށް ވެސް މަޝްވަރާ ކުރަން ޖެހޭ މުހިންމު ކަންކަން އެބަހުރި ކަމަށެވެ.
ޕީޕީއެމުން އެއްވެސް ލިޔުމެއްގައި ސޮއިކުރަން ބޭނުން ނުވާ ކަމަށް ޑިމޮކްރެޓްސް އިން ދާދި ފަހުން ބުނެފައިވާއިރު ތޮލާލް ވިދާޅުވީ އެއްބަސްވުމެއްގައި ސޮއިކުރަން ބޭނުން ނުވާ ކަމަށް މުޅިން ނިންމާފައި ނުވާނެ ކަމަށާއި ސޮއިކުރަންޖެހިއްޖެ ނަމަ އެކަން ވެސް ކުރާނެ ކަމަށެވެ. އަދި އެއްޗެއްގައި ސޮއިކުރެވޭނީ މަޝްވަރާތަކަށްފަހު ކަމަށް ވިދާޅުވި އެވެ.
ޑިމޮކްރެޓްސްއާ އެކު އެމްޑީޕީން ވެސް މަޝްވަރާތައް ކުރަމުންދާއިރު، މިރޭ ބާއްވާ އެ ޕާޓީގެ އިންޓެރިމް ކައުންސިލް ބައްދަލުވުމަށް ފަހު ދެވަނަ ބުރުގައި ޑިމޮކްރެޓްސް އޮންނާނެ ކޮޅަކާ މެދު މަޝްވަރާކޮށް ގޮތެއް ނިންމާނެ ކަމަށް ވެއެވެ. އެ ބައްދަލުވުން އޮންނާނީ މިރޭ 9 ޖަހާއިރު ބިލަބޮން ހައި އިންޓަނޭޝަނަލް ސްކޫލުގަ އެެވެ.
ރިޔާސީ އިންތިޚާބުގެ ދެވަނަ ބުރު ކާމިޔާބުކުރުމަށް ދެ ކެންޑިޑޭޓުންނަށްވެސް ދަ ޑިމޮކްރެޓްސްއާއި ގުޅުން މުހިންމެވެ. އެއީ ޑިމޮކްރެޓްސްގެ ރިޔާސީ ކެންޑިޑޭޓަށް އިންތިޚާބުގެ 15،839 ގިނަ ވޯޓާއެކު ތިންވަނަ ލިބުމެވެ. އެއީ އިންތިޚާބުގެ 7.18 އިންސައްތަ ވޯޓެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ލިބިވަޑައިގަތީ ވޯޓުލީ މީހުންގެ ތެރެއިން 84،805 ވޯޓެވެ. އެއީ 39.04 ޕަސަންޓެވެ. ވާދަވެރި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ލިބިވަޑައިގަތީ 100,342 ވޯޓެވެ. އެއީ 46.19 ޕަސަންޓެވެ.
ރިޔާސީ އިންތިހާބުގެ ދެވަނަ ބުރުގައި ވޯޓުލުން އޮންނާނީ މިމަހުގެ 30 ވަނަ ދުވަހު އެވެ.
