ސަރުކާރުގެ ފަރާތުން މި އިސްލާހު މަޖިލިހަށް ހުށައެޅި ދިއްދޫ ދާއިރާގެ މެންބަރު އަބްދުއްލަތީފް މުހައްމަދުއެވެ. އެނާ ހުށައަޅުއްވާފައިވަނީ ސިޔާސީ ޕާޓީގެ ޤާނޫނު އިސްލާހު ކުރުމަށެވެ.
ސަރުކާރުން މި ގާނުނަށް ހުށައެޅި އިސްލާހުގައި ވަނީ ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފިނަމަ، އެ މީހަކު ނިސްބަތްވާ ޕާޓީ 100،000 ރުފިޔާއިން ޖޫރިމަނާ ކުރެވޭނެކަަމަށެވެ. މިހާރު ގާނޫނު ބުނާގޮތުން ޕާޓީއެއްގެ މެންބަރުކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް -/5,000 ރުފިޔާއާއި -/10,000 ރުފިޔާއާ ދެމެދުގެ ޢަދަދަކުން ޖޫރިމަނާކުރެވޭނެއެވެ. އަދި އެނޫންކަމެއް ކޮށްފިނަމަ އެ މީހެއް -/30,000 ރުފިޔާއާއި -/75,000 ރުފިޔާއާ ދެމެދުގެ ޢަދަދަކުން ޖޫރިމަނާކުރެވޭނެކަމަށްވެސް މިހާރު އަމަލުކުރާ ގާނޫނުގައިވެއެވެ.
ސަރުކާރުން ހުށައެޅި އިސްލާހުގައި ވަނީ މި މާއްދާއަށް އިތުރު ނަމްބަރެއް ހިމަނާ ގަވައިދާ ހިލާފަށް އަމަލުކުރާ ޕާޓީގެ މެމްބަރުންގެ އިތުރުން ޕާޓިވެސް ޖޫރިމަނާ ކުރެވޭގޮތް ހަދަންށެވެ. އެ ގޮތުން ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފިނަމަ، އެ މީހަކު ނިސްބަތްވާ ޕާޓީ 100،000 ރުފިޔާއިން އިން ޖޫރިމަނާ ކުރަން ވަނީ ހިމަނާފައެވެ.
މީގެ އިތުރުން ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ ކެންޑިޑޭޓަކު އެހެން ހައިސިއްޔަތަކުން އިންތިހާބުތަކުގައި ވާދަ ނުކުރެވޭނެކަމަށް ސިޔާސީ ޕާޓިތަކުގައި ބުނާ މާއްދާ އުވާލުމަށް ހުށައަޅާފައެވެ. ރައީސް ޔާމީންގެ ވެރިކަމުގައި ގާނޫނަށް އިތުރުކުރި އެ އިސްލާހުގައި ވަނީ ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބުގައި އެހެން އެއްވެސް ހައިސިއްޔަތަކުން ކެންޑިޑޭޓެއްގެ ގޮތުގައި ކުރިމަތިލުމަށް އިލެކްޝަންސް ކޮމިޝަނަށް ހުށަހަޅައިފިނަމަ، އެ ކޮމިޝަނުން އެ މީހެއްގެ ކެންޑިޑެސީ ބާތިލު ކުރަންވާނެކަމަށެވެ.
