މި މަހުގެ 30 ވަނަ ދުވަހު ބާއްވާ އިންތިހާބުގެ ދެ ވަނަ ބުރުގެ ކެމްޕެއިނަށް، ހެންވޭރުގެ ގޭގެއަށް ދޮރުން ދޮރަށް ފެއްޓެވުމަށްފަހު، މީޑިއާތަކާ ވާހަކަދައްކަވަމުން، ނޫސްވެރިއެއްގެ ސުވާލަކާ ގުޅިގެން ރައީސް ވިދާޅުވީ އެ(މުއިއްޒު) ދައްކަވަނީ ވަރަށް ބިރުވެރި ވާހަކައެއް ކަމަށާއި އަނެއްކާވެސް އިދިކޮޅުން އުޅުއްވަނީ ބާރުތައް ސެންޓްރަލައިޒް ކުރުމުގެ މަސައްކަތެއް ކުރަން ކަމަށެވެ.
ޕީޕީއެމްގެ ވެރިކަމުގައި ކައުންސިލްތަކަށް ހަދަމުންދިޔަ ގޮތް އެންމެންނަށް ފެންނާނެ ކަމަށާއި އެގޮތުން ކައުސިލްތައް ސަސްޕެންޑްކޮށް ކައުންސިލްތަކުގެ ބާރުތައް ސަރުކާރަށް ނެގީ ކަމަށް ރައީސް ވިދާޅުވި އެވެ.
ރައީސް ވިދާޅުވީ އަނެއްކާވެސް ފެންނަނީ އިދިކޮޅުން އަނބުރާ މާލެއަށް ބާރުތައް ޖަމާކުރާތަން ކަމަށާއި އެއީ ބިރުވެރިކަމެއް ކަމަށެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭނުގައި ހދ. ފިނޭގައި އިދިކޮޅު ފަރާތްތަކުން ބޭއްވި ކެމްޕެއިން ޖަލްސާގައި މުއިއްޒު ވަނީ ސަރުކާރު ގްރާންޓުން ކައުންސިލްތަކަށް ނުވާ ކަމަށާއި، އިތުރު އެހީތައް ފޯރުކޮށްދިނުމަށް އެކަމަށް ހާއްސަ މިނިސްޓްރީއެއް ޤާއިމް ކުރާނެ ކަމަށް ވިދާޅުވެފަ އެވެ. އޭރުން ވަރަށް ރަނގަޅަށް ކައުންސިލްތައް ބާރުވެރިކުރެވި މަސައްކަތް ކުރާތަން ފެންނާނެ ކަމަށް ވިދާޅުވި އެވެ.
އެލްޖީއޭ އަކީ ކައުންސިލްތަކުގެ ބެލެނިވެރި ފަރާތް ނުވަތަ އެހީތެރިއެއްގެ ގޮތުގައި އޮތް ނަމަވެސް، މުއިއްޒު ވިދާޅުވީ އެލްޖީއޭ ވެސް ހަގީގަތުގައި ބާރުވެރި ނޫން ކަމަށެވެ.
