ހެންވޭރުގެ ގެތަކަށް ދޮރުން ދޮރަށް ހިންގަވަން ފެއްޓެވުމުގެ ކުރިން ނޫސްވެރިންނާ ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މަޖިލިސް ހުއްޓުވާލުމުގައި އެމަނިކުފާނުގެ އެއްވެސް ބައިވެރިވުމެއް ނޯންނާނެ ކަމަށާއި، އެއީ ކަނޑައެޅިގެން ދޮގެއް ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފެށުމުގެ ވަގުތު ޖެހުނުއިރު މަޖިލީހުގެ ތަޅުމުގައި ތިއްބެވީ، 17 މެމްބަރުންނެވެ. މަޖިލީހުގެ ޖަލްސާއެއް ފެށުމަށް ކޯރަމް ހަމަވާ އަދަދަކީ 22 މެމްބަރުންނެވެ. ކޯރަމް ހަމަނުވެ، ޖަލްސާ ފެށުމަށް އޮތްގަޑިއަށް ނުފެށުމުން، އެކަމުގެ ހިތްހަމަނުޖެހުން ފާޅުކުރައްވާ ނަޝީދު ވިދާޅުވީ ޖަލްސާގެ ކޯރަމް ހަމަނުވަނީ އެމްޑީޕީ އަށް ނިސްބަތްވާ މެމްބަރުން މަޖިލީހުގެ ތަޅުމަށް ހާޒިރުނުވުމުން ކަމަށާއި، އެކަގެ ޒިންމާ ރައީސުލްޖުމްހޫރިއްޔާ ނަންގަވަންޖެހޭނެ ކަމަށެވެ.
އަދި މިއަދު، ރައްޔިތުންގެ މަޖިލީހުގެ އިދާރާގެ ފަރާތުން، ރައީސުލްޖުމްހޫރިއްޔާ އަށް އެޑްރެސް ކުރައްވައި، ރައީސް ނަޝީދު ވަނީ ސިޓީފުޅެއް ވެސް ފޮނުވާފައިއެވެ. މިސިޓީފުޅުގައި ރައީސް ނަޝީދު ވިދާޅުވީ، ދިވެހި ދައުލަތުގެ ބާރުތައް އަތްޕުޅު މައްޗަށް ނަންގަވައި، ދިވެހި ދައުލަތް ހުއްޓުވާލެއްވުމަށް ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްތައް ހުއްޓާލެއްވުމަށް ގޮވާލާ ކަމަށެވެ.
ރައީސް ނަޝީދު އެހެން ވިދާޅުވިޔަސް، ރައްޔިތުންގެ މަޖިލީހުގައި މިއަދު ކުރިއަށް ދިޔަ ދިވެހިރާއްޖޭގައި އޮންނަން ފެންނަ ވެރިކަމުގެ ނިޒާމާއި ބެހޭގޮތުން ރައްޔިތުންގެ ފެންނަ ނުފެންނަ ވޯޓަކަށް އެހުމުގެ ގަރާރު ބަލައިގަނެ، މުޅި މަޖިލީހުގެ ކޮމިޓީއަކަށް ފޮނުވުމަށް ފާސްވީ އެމްޑީޕީގެ 21 މެމްބަރެއްގެ ތާއީދާއެކު ކަން ފާހަގަކޮށްލެވެއެވެ. ގަރާރު ފާސްކުރަން ވޯޓް ދެއްވި މެމްބަރުންގެ ތެރޭގައި އައްޑު އަތޮޅު ހިތަދޫ އުތުރު ދާއިރާގެ މެމްބަރު، އަދި ރިޔާސީ އިންތިހާބުގައި ރައީސް ސޯލިހުގެ ރަނިންގްމޭޓަކަށް ކަނޑައަޅުއްވާފައިވާ މުހައްމަދު އަސްލަމްވެސް ހިމެނިވަޑައިގަންނަވައެވެ.
