![](https://cnm.mv/media/images/ebhergE.jpg)
ގަލޮޅު ކަންމަތީގައި އެމްޑީޕީން މިހާރު ބާއްވަމުން ގެންދާ ކެމްޕޭން އެއްވުމުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ދަފުތަރުގައި ޖެހިފައި ތިބޭތާ 20 އަހަރުވެފައިވާ މީހުންނާއި މާލޭގައި ދިރިއުޅޭތާ 20 އަހަރުވެފައިވާ އެންމެންނަށް ގޯއްޗާއި ފުލެޓު ދިނުމަށް އިތުރު ހައުސިން މަޝްރޫއެއް އިއުލާން ކުރަން ތައްޔާރުވަމުންދާ ކަމަށެވެ.
ރައީސް ސޯލިހު ވިދާޅުވީ މާލޭގައި ދިރިއުޅޭތާ 40، 50 އަހަރުވީ ބައެއް މީހުން އެބަތިބި ކަމަށާއި އެފަދަ ބައެއް މީހުންނަކީ އެމީހުން އުފަން ރަށުގައި ދިރިނޫޅޭތީ ބޯހިޔާވަހިކަން ރަށުން ނުލިބޭނެ މީހުން ކަމަށެވެ. އަދި ސިޔާސަތުތައް ހުރި ގޮތުން އެފަދަ މީހުންނަށް މާލޭގައި ވެސް ބޯހިޔާވަހިކަން ނެތް ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު މިރޭ ވިދާޅުވީ ކަސްޓަމްސްއާއި ގައުމީ ޔުނިވާސިޓީ އަދި ކަރެކްޝަނުގައި އުޅޭ މީހުންނަށް ފްލެޓު ދިނުމަކީ އެމަނިކުފާނު އެއްބަސްވެވަޑައިގެންފައިވާ ކަމެއް ކަމަށާއި އޭގެތެރެއިން ކަސްޓަމްސްގެ މީހުންނަށް ފްލެޓުތައް ދިނުމަށް މިއަދު ލިސްޓު ހަވާލުކޮށްފައިވާނެ ކަމަށެވެ.
ރައީސް ސޯލިހުގެ ސަރުކާރުން ވަނީ ބިންވެރިޔާގެ ނަމުގައި މާލޭގެ ރަށްވެހިންނަށް ގޯތި ދީފައެވެ. ބިންވެރިޔާ ސްކީމްގެ ދަށުން ގޯއްޗަށް ހުުށަހެޅި ފަރާތްތަކުގެ ތެރެއިން 19،639 ފަރާތަކަށް ގޯތި ދިނުމަށްވަނީ ނިންމާފައެވެ.