އާސްކު މުއިއްޒުގެ ނަމުގައި މިރޭ ކުރިއަށް ގެންދިޔަ ޕްރޮގުރާމުގައި ވާހަކަ ދައްކަވަމުން މުއިއްޒު ވިދާޅުވީ ކެބިނެޓުގައި ކޮންމެ ދާއިރާއެއް ވެސް ހާއްސަ ކުރައްވާނީ އެ ދާއިރާއިން ތައުލީމު ހާސިލުކޮށްފައިވާ ހިންގުންތެރި ހީވާގި މީހުންނަށް ކަމަށެވެ.
ބައިވެރިޔަކު އެ ޕްރޮގުރާމުގައި މުއިއްޒާއި ސުވާލު ކުރިމަތިކޮށްފައިވަނީ ސަލަފު ޖަމިއްޔާއަަށް އެޑިއުކޭޝަން މިނިސްޓްރީން ދީފާނެ ކަމަށް ބުނެ ދެކެވެމުންދާ ވާހަކަތަކާއި ގުޅިގެންނެވެ. ޖަވާބުގައި މުއިއްޒު ވިދާޅުވީ އެކަހަލަ އެއްވެސް ކަމެއް ކުރައްވަން ނޫޅުއްވާ ކަމަށެވެ.
މުއިއްޒު ވިދާޅުވީ އެބޭފުޅާގެ ކެބިނެޓެއްގައި ކޮންމެ ދާއިރާއެއްގައި ވެސް ތިބޭނީ އެ ދާއިރާއަކުން ކިޔަވައިގެން ތަޖުރިބާ ހޯއްދަވައިގެން ތިބި މީހުން ކަމަށެވެ.
މުއިއްޒު ވިދާޅުވީ ވެރިކަމަށް ވަޑައިގަންނަވަނީ ފުރަތަމަ ދުވަހުން ފެށިގެން ނަތީޖާ ނެރެދޭން ބޭނުންވާ ކަމަށާއި އެކަން ކުރެވޭ ވަރުގެ މީހުން ކެބިނެޓަށް ގެންނަން އިސްކަން ދެއްވާނެ ކަމަށެވެ. އަދި ކެބިނެޓުގައި ތިބޭނީ އެބަޔަކަށް މުއިއްޒުގެ ފުރިހަމަ އިތުބާރު އޮންނަ ރައްޔިތުން ފަހުރުވެރިވާނެ ފަދަ ބައެއް ކަމަށް މުއިއްޒު ވިދާޅުވިއެވެ.
