އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާ އެކު ގަލޮޅުގައި ރޭ ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން ދޮންބިލެތް ވިދާޅުވީ އެމްޑީޕީގައި ވަރަށް އެކުވެރިކޮށް އުޅުނު ގިނަ މީހުންތަކެއް މާޔޫސްކަމާއި އުނދަގޫ ހާލަތެއްގައި ތަންކޮޅެއް ދުރަށް ޖެހިގެން އެބައުޅޭ ކަމަށާއި މާޒީގައި ކަންތައް ވެގެންދިޔަ ގޮތާ މެދު ޑިމޮކްރެޓްސްގެ ބޭފުޅުން ވިސްނަން ޖެހޭ ކަމަށެވެ.
ދޮން ބިލެތް ވިދާޅުވީ ކުރީގެ ރައީސް އަބްދުﷲ ޔާމީންގެ ހީލަތްތެރި ރޭވުމުގެ ދަށުން ޕާޓީގެ ތެރޭގައި ޖެހުނު މައްސަލައިގެ "އެޑްވާންޓޭޖް" ނަގައިގެން ޕީޕީއެމުން މަސައްކަތް ކުރަނީ ދެ ވަނަ ބުރުގައި ޑިމޮކްރެޓުންގެ ވޯޓު މުއިއްޒަށް ދިނުމަށް ކަމަށެވެ.
އޭނާ ވިދާޅުވީ ރަށްރަށުގައި ތިބި ޑިމޮކްރެޓުން މަޑު މަޑުން އެނބުރި އެމްޑީޕީއާ އަލުން ގުޅެމުންދާ ކަމަށެވެ.
އިދިކޮޅު ރިޔާސީ ކެންޑިޑޭޓު މުއިއްޒަށް ފާޑު ކިޔުއްވައި ދޮންބިލެތް އިތުރަށް ވިދާޅުވީ މުއިއްޒުގެ ވައުދުތަކުގެ ތެރޭގައި ރައްޔިތުންނަށް ކަމެއް ކޮށްދޭ ވާހަކަ ނެތް ކަމަށެވެ. އަދި މުއިއްޒު ވަޑައިގެން ހުންނެވީ އެއްވެސް ޕްލޭނެއް ނެތް ކަމަށް ދޮންބިލެތް ވިދާޅުވިއެވެ.
