މިރޭ ހުވަދޫ ޖަގަހައިގައި ބޭއްވި ކެމްޕެއިން ޖަލްސާގައި ވާހަކަފުޅުދައްކަވަމުން އެމްޑީޕީއާއި ގުޅިފައިވާ ޕާޓީތަކުގެ ރިޔާސީ ކެންޑިޑޭޓު ރައީސް ސޯލިހު ވިދާޅުވީ ކޮވިޑު-19 އާ ގުޅިގެން ވަރަށް ބޮޑެތި ދަތިތައް އާންމު ރައްޔިތުންނަށް ކުރިމަތިވި ކަމަށެވެ. އެކަމުން އަރައިގަތުމަށްޓަކައި އެސްޑީއެފްސީ މެދުވެރިކޮށް ބައެއް ލޯނު އާންމުންނަށް ދޫކުރިކަން ފާހަގަކުރައްވާ ރައީސް ވިދާޅުވެފައިވަނީ ޑޯޓުޑޯއަށް ހިނގިއިރު ބައެއް ފަރާތްތަކުން އެދުނު އެއް ކަމަކީ މިހާރު ދޫކޮށްފައިވާ ލޯނު އަނބުރާ ދައްކަން ޖެހޭ މުއްދަތު އިތުރުކޮށްދިނުމާއި ލޯނުން ނަގާ އިންޓްރެސްޓް ކަނޑާލުން ކަމަށެވެ. މިއަދު އެކަމަށް ގޮތެއް ނިންމަވާފައިވާ ކަމަށް ރައީސް ވިދާޅުވިއެެވެ.
ރިޔާސީ އިންތިހާބުގެ ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް އިލެކްޝަންސް ކޮމިޝަން (އީސީ) އިން ނިންމާފައިވާއިރު، އިންތިހާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުން ވެސް ދަނީ ތާއީދު އިތުރުކުރުމަށް ކޮންމެ ދުވަހަކުވެސް ހަރަކާތްތައް ހިންގަވަމުންނެވެ. އެގޮތުން ރައީސް ސޯލިހު މާލޭ ސިޓީގައި ބާއްވަމުން އަންނަ ހަރަކާތްތަކުގައި ބައިވެެރިވެވަޑައިގެން ކެމްޕެއިން ކުރައްވަމުން އަންނައިރު، ވާދަވެެރި ޕީޕީއެމް/ޕީއެންސީ ކޯލިޝަނުގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ގެންދަވަނީ ރަށްތަކަށް ދަތުރު ކުރައްވަމުންނެވެ.
