ފިނޭންސް މިނިސްޓަރު މިހެން ވިދާޅުވެފައިވަނީ ބޭރު ގައުމުތަކުން ނަގާ ލޯނުތަކުގެ އިންޓްރެސްޓް ރޭޓް ފަދަ މައުލޫމާތުތައް މި ސަރުކާރުން ސިއްރުކުރާ ކަމަށް ވާދަވެެރި ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ދެއްކެވި ވާހަކައަކާ ގުޅިގެންނެވެ.
ބޭރު ގައުމުތަކުން ނަގާ އެއްވެސް ލޯނެއްގެ މައުލޫމާތު ސިއްރު ނުކުރާކަން ހާމަކުރައްވާ މިނިސްޓަރު ވިދާޅުވީ ގާނޫނުގައިވާ ގޮތުގެ މަތިން އެ މައުލޫމާތު ހިއްސާކުރަން ޖެހޭ ފަރާތްތަކާ ހިއްސާ ކުރައްވާ ކަމަށާއި އެހެން މައުލޫމާތު ފިނޭންސް މިނިސްޓްރީގެ ވެބްސައިޓުގައި ފެންނަން ހުންނާނެ ކަމަށެވެ.
ބ. ކަމަދޫގައި ބޭއްވި ޖަލްސާގައި ވާހަަކަ ދައްކަވަމުން މުއިއްޒު ވިދާޅުވި ގޮތުގައި ފެންނަނީ ދަރަނި މައްޗަށް ދަރަނި ނަގަމުންދާ ތަން ކަމަށާއި ބޭރުން ނަގާ ލޯނުތަކުގެ އިންޓްރެސްޓް ރޭޓާއި އެ ލޯނު ދައްކަން ޖެހޭ މައުލޫމާތު ހާމަކުރުމަކީ ގައުމީ ސަލާމަތަށް ނުރައްކާ ވާ ކަމެއް ކަމަށް ސަރުކާރުން ދެކޭ ކަމުގައެވެ.
ލޯނުތަކާ ބެހޭ މައުލޫމާތު އެމްއެމްއޭގެ ގަވަރުނަރަށް އެނގިވަޑައިނުގަންނަވާ ކަމަށް މުއިއްޒު ވިދާޅުވިއެވެ. މުއިއްޒުގެ ވާހަކައިގައި ވަނީ ލޯނު ނެގުމަށްޓަކައި ރާއްޖޭގެ ބައެއް ސްކޫލްތައް ރަހުނުކޮށްފައިވާ ކަމަށް ތުހުމަތުކުރައްވާފައެވެ. އެހެންނަމަވެސް ލޯނު ނެގުމަށް ސްކޫލުތައް ރަހުނު ކުރާ ކަމަށް ވާދަވެރިން މީގެކުރިން ދެއްކި ވާހަކަތައް ސަރުކާރުން ވަނީ ދޮގުކޮށްފައެވެ.
