އެ ކޮމިޝަނުން ރޭ ނެރުނު ބަޔާނެއްގައި ބުނީ އެ ކޮމިޝަންގެ އޮފިޝަލުންނާއި، ރާއްޖޭގައި ސުލްހަވެރިކަމާ އެކު ދިރިއުޅެމުންދާ އިންޑިއާގެ ބިދޭސީންނަށް ފުރައްސާރަކުރުމާއި ބިރުދެއްކުމުގެ މަގުސަދުގައި ދޮގު ރިޕޯޓްތައް ފަތުރަމުންދާކަން އެ ކޮމިޝަންގެ ސަމާލުކަމަށް އައިސްފައިވާ ކަމަށެވެ.
އެ ގައުމާ ގުޅުވައިގެން ދޮގު ހަބަރު ފަތުރަނީ ދެ ގައުމު ދޭތެރޭ އޮންނަ ގުޅުމަށް ނޭދެވޭ އަސަރު ފޯރުވުމަށާއި އަދި އެއީ ރާއްޖޭގައި ބިރުވެރިކަން ފެތުރުމަށް ކުރަމުން އަންނަ ކަމެއް ކަމަށް ވެސް އިންޑިއާއިން ބުންޏެވެ.
އިންޑިއާއިން ގެންގުޅޭ "ނެއިބާހޫޑް ފަސްޓް" ސިޔާސަތުގެ ދަށުން ރާއްޖެއަށް ހާއްސަ ކަމެއް ދީފައިވާކަން ފާހަގަކޮށް އެ ބަޔާނުގައިވަނީ ރާއްޖެ އަންނަ އެ ގައުމުގެ މަސައްކަތްތެރިންނާއި ޓޫރިސްޓުންނަށް ވެސް ދިވެހިންގެ މެހެމާންދާރީ އާއި ލޯބި ލިބޭ ކަމަށެވެ.
ރާއްޖޭގައި އިންޑިއާ ސިފައިން ތިބޭ މައްސަލާގައި ސަރުކާރާއި އިންޑިއާއަށް އާންމުންގެ ބޮޑު ފާޑުކިޔުމެއް އޮވެއެވެ. ސިޔާސީ ވާދަވެރީން ވެސް ވަރަށް ބޮޑަށް ފާޑު ކިޔައެވެ. ރިޔާސީ އިންތިހާބުގައި ވާދަކުރައްވާ، އިދިކޮޅު ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ވަނީ އިންޑިއާ ސިފައިން ރާއްޖެއިން ބާލާނެ ކަމަށް ވެސް ވިދާޅުވެފައެވެ.
އެގޮތުން އިންޑިއާ ސިފައިން ރާއްޖޭގައި ތިބެނީ ސަރުކާރަށް އެނގިގެން ކަމަށާއި އެއީ ރާއްޖޭގެ ސަލާމަތީ ރައްކާތެރިކަމަށް އޮންނަ ނުރައްކަލެއްގެ ގޮތުގައި އެފަރާތްތަކުން ސިފަކުރައްވައެވެ.
އެކަމަކު، ރައީސް އިބްރާހިމް މުހައްމަދު ސޯލިހް ވަނީ ސަރުކާރާ ދެކޮޅު ސިޔާސީ ޕާޓީތަކުގެ ތުހުމަތުތައް ތަކުރާރުކޮށް ދޮގު ކުރައްވައިފައެވެ.
