އަންނަ ހޮނިހިރި ދުވަހު އޮންނަ ރިޔާސީ އިންތިހާބުގެ ދެވަނަ ބުރުގެ ކެމްޕޭނަށް ރާއްޖޭގެ އެކި އަތޮޅުތަކަށް މިހާރު ކުރައްވަމުން ގެންދަވާ ދަތުރުފުޅުގައި ހދ. ކުޅުދުއްފުއްޓަށް ވަޑައިގެން ދެއްކެވި ވާހަކައިގައި މުއިއްޒު ވަނީ ދެމެހެއްޓެނިވި ތަރައްގީގެ ދާއިރާއިން އޭނާގެ މެނިފެސްޓޯގައި ހިމަނާފައިވާ ބައެއް ކަންކަމަށް އަލިއަޅުވާލައްވާފަ އެވެ.
މުއިއްޒު ވިދާޅުވީ ދެމެހެއްޓެނެވި ތަރައްޤީ ރާއްޖެއަށް ގެނެވޭނީ ތިމާވެއްތާ ރައްޓެހި ވެހިކަލްތައް ތައާރަފްކޮށް އެފަދަ ނިޒާމެއް ނުވަތަ ސިސްޓަމެއް ގެނައުމުން ކަމަށެވެ.
މުއިއްޒު ވިދާޅުވީ ބައިސްކަލް ދުއްވަން މީހުން ބޮޑަށް ޝައުގުވެރި ކުރުވަން ވެސް އޭނާގެ ސަރުކާރެއްގައި އެކި ކަހަލަ މަޝްރޫއުތަކެއް ހިންގާނެ ކަމަށެވެ. އެގޮތުން އީ ބައިކް ނިޒާމު ރާއްޖެ އަށް ގެނެސް ބައިސްކަލް ދުއްވުމަކީ އަނެއްކާ ވެސް ދިވެހިންގެ މެދުގައި އާދައަކަށް ހެދުމަކީ ކުރިއަށްދާން ވިސްނާއިރު ކުރަންޖެހޭ ކަމެއް ކަމަށްވެސް ވިދާޅުވެފަ އެވެ.
ރާއްޖެއަށް އިލެކްޓްރިކް ވެހިކަލް ގެންނަން ފެށުމާ އެކު، އެ ވެހިކަލްތަކަށް ހާއްސަ ޗާޖިން ސްޓޭޝަންތައް ގާއިމްކުރެވޭނެ ކަމަށް ވެސް މުއިއްޒު ވިދާޅުވި އެވެ.
ރޭގެ ޖަލްސާގައި މުއިއްޒު ވިދާޅުވީ އޭނާގެ ސަރުކާރެއްގައި، ރާއްޖެ ތަރައްގީކުރުމަށް ދިގު ރާސްތާއަކަށް ވިސްނައި 20 އަހަރުގެ މާސްޓަޕްލޭނެއް ހައްދަވާނެ ކަމަށެވެ. އެ ޕްލޭންގެ ދަށުން ރާއްޖޭގެ އެކި ސަރަހައްދުތައް ތަރައްގީކުރާ އިރު، ކުޅުދުއްފުއްޓަކީ ހާއްސަ އިސްކަމެއް ދީގެން، މައި މަރުކަޒެއްގެ ގޮތުގައި ތަރަައްގީކުރާނެ ތަނެއް ކަމަށް ވެސް މުއިއްޒު ވިދާޅުވި އެވެ.
ކުޅުދުއްފުއްޓަށް ދިމާވެފައިވާ ގެދޮރުގެ ދަތިކަން ހައްލުކުރުމަށް 2،000 ހައުސިން ޔުނިޓް އަޅައިދިނުމަށް އޭނާ ރޭ ވައުދުވެވަޑައިގެންނެވި އެވެ. މުއިއްޒު ވިދާޅުވި ގޮތުގައި، އޭނާގެ ވެރިކަން ނިމޭއިރު ކުޅުދުއްފުށިން ގެދޮރު ނުލިބޭ އެކަކު ވެސް ނުހުންނާނެ އެވެ.
އިދިކޮޅު ޕީޕީއެމް-ޕީއެންސީގައި ހުންނާނީ ކުރިއަށް ދިޔުމުގެ ވިސްނުމާއި ދިވެހިންގެ މާހައުލާއި ގުޅޭ ގޮތަށް ތަރައްގީ ގެނައުމުގެ ވިސްނުން ކަމަށް މުއިއްޒު ވިދާޅުވި އެވެ. އަދި މިގޮތަށް ކުރިއަށްދާން ބޭނުންވާނަމަ އޭނާ އަށް ވޯޓު ދެއްވުމަށް މުއިއްޒު އެދިވަޑައިގެންނެވި އެވެ.
