އަމްރު ދެންމެ ކުރެއްވި ޓްވީޓެއްގައި ވިދާޅުވީ ޕާޓީގެ އެތެރޭގެ އިންތިހާބު އިއުލާން ކުރުމުން ޕާޓީގެ ރައީސް ކަމަށް ކުރިމަތިލާން ނިންމާފައިވާ ކަމަށެވެ.
ޑިމޮކްރެޓްސްގެ އަށް ވަނަ ވަގުތީ ކައުންސިލު ބައްދަލުވުން ބާއްވާފައި ވަނީ މިއަދު ހަވީރު ބޮޑުފެންވަޅުގޭގައި ހުންނަ އެ ޕާޓީގެ އޮފީހުގަ އެވެ. އެ ބައްދަލުވުމުގައި ފާސްކޮށްފައި ވަނީ އެ ޕާޓީގެ އެތެރޭގެ އިންތިހާބު އަންނަ މަހުގެ ދެވަނަ ދުވަހު ބޭއްވުމަށެވެ.
އެމްޑީޕީ ތެރޭގައި އުފެދުނު ހިޔާލު ތަފާތުވުންތަކުގައި އަމްރު ވަނީ ރައީސް ނަޝީދުއަށް ތާޢީދު ކުރައްވާ ޑިމޮކްރެޓްސްއާއި ގުޅިވަޑައިގެންފައެވެ. އަދި އަމްރު ނިސްބަތްވެ ވަޑައިގަންނަވާ ޑިމްކްރެޓްސް އިން ވަނީ ރިޔާސީ އިންތިހާބުގެ ދެވަނަ ބުރެއްގައި އެއްވެސް ޕާޓީއަކަށް ތާއީދު ނުކުރުމަށް ނިންމައިފަ އެވެ.
ރިޔާސީ އިންތިހާބުގެ ފުރަތަމަ ބުރުގައި ޑިމޮކްރެޓްސްގެ ކެންޑިޑޭޓު އިލްޔާސްއަށް ލިބިވަޑައިގަތީ ގާތްގަނޑަކަށް 15،800 ވޯޓެވެ.
